Ditën e sotme shënohen 16 vite nga masakra e Gërdecit, ku 26 persona humbën jetën dhe mbi 300 të tjerë mbetën të plagosur nga shpërthimi në fabrikën e demontimit të armëve në Gërdec. 28 të pandehurit e dërguar në gjykatë sot janë liruar nga burgu dhe ende nuk është vënë drejtësi.
Por familjarët e viktimave kanë ende shpresën se drejtësia e re do të çojë pas hekurave përgjegjësit e një prej tragjedive më të mëdha të ndodhura ndonjëherë në vendin tonë.
GJKKO po heton çështjen për akuza të rënda “Korrupsion i zyrtarëve të lartë” dhe “pastrim parash”, ndërsa ka marrë të pandehur ish-ministrin e Mbrojtjes Fatmir Mediun.
Ku jemi me procesin në GJKKO
Më 13 mars ishte seanca e radhës nga ish-ministrit të Mbrojtjes Fatmir Mediu asokohe, i cili refuzoi që të dëshmonte në GJKKO në cilësinë e të pandehurit për masakrën e Gërdecit. Mediu përmes një deklarate nuk pranoi të pyetej në seancën gjyqësore, por kërkoi që të ishte i fundit që të jepte sqarime pasi sipas tij në këtë moment të procesit do të jetë ishte thjesht një akt formal, që nuk i shërben aspak të vërtetës, por thjeshtë statistikës. Mediu e konsideroi një proces të manipuluar mediatikisht dhe politikisht hetimin dhe gjykimin për masakrën e Gërdecit.
Mënyra se si do të merren në pyetje Patrik Henri, pronar i kompanisë SAC dhe 4 punonjës të kompanisë që ishte kontraktuar për demontimin e armëve në Gërdec u bë shkak i një debati të ashpër në seancë. Prokurorët e SPAK thanë se pyetja e tyre me video-konferencë është e vështirë të realizohet dhe kërkuan që ajo të bëhej përmes letërporosive, në një seancë gjyqësore në SHBA. Por kjo u kundërshtua nga avokatët e Mediut dhe ai i familjarëve të viktimave, pasi sipas tyre vetëm përmes videokonferencës dhe pyetjeve direkte nga palët do të mund të ishin dëshmi ezauruese. Ende nuk ka një vendimmarrje në këtë pikë ku pritet të vendoset në ditët në vijim nga togat e zeza.
Familjarë e viktimave i kërkuan gjykatës se si do të procedohet me marrjen në pyetje të ish gjeneralit Luan Hoxha, ndërsa gjykata tha se është në kompetencë të prokurorëve. SPAK ende nuk ka dhënë një sqarim. Më herët Dashnor Caushi, bashkë i pandehur i dënuar me 3 vite burg për shpërdorim detyre, nuk pranoi të fliste duke shfrytëzuar të drejtën që ia njeh ligji. Seanca e radhës do të mbahet më 27 mars, ndërsa nuk u paraqitën për të dëshmuar edhe Denis Hajdari dhe Anjola Agolli të cilët nuk u gjetën në adresat përkatëse për të marrë njoftim. Agolli ish-sekretare e Ministrit të Drejtësisë, kërkohet që të merret në pyetje lidhur me faksin për ‘Shkëlzen Berishën’ dërguar nga Ministria e Drejtësisë tek ajo e Mbrojtjes.
Çfarë ndodhi në 15 mars?
15 mars 2008, mesditë ora 12:05 një shpërthim i fuqishëm tronditi Tiranën, ndërsa krateri i tij u shënua pak kilometra më tutje në fshatin Gërdec në Vorë. Teksa minutat kalonin ajo çka kishte ndodhur ishte e paimagjinueshme, 26 të vdekur e mbi 300 të plagosur dhe mbi 100 shtëpi të rrafshuara. Këto ishin pasojat e shpërthimit në punishten e demontimit të municioneve shtetërore në pronësi të biznesmenit Mihal Delijorgji. Sot 16 vite më pas, ai shpërthim është ende i freskët në memorien e të gjithë. Kjo ngjarje përfundoi dhe në dyert e gjykatave shqiptare, por sot për 26 të vdekur e 300 të plagosur nuk ka asnjë person pas hekurave. Pati dëshmitarë që u arratisën, ushtarak që morën azil politik, por për familjarët asnjëherë nuk u vendos drejtësi.
