“Tashmë skenari katastrofik të cilit i druheshin të gjithë është materializuar, duke e bërë shpërbërjen e Bashkimit Evropian praktikisht të paevitueshëm”, ka deklaruar miliarderi George Soros pak ditë pas vendimit të referendumit Britanik.
“Tregjet financiare anembanë botës pritet të mbeten të pasigurta për aq kohë sa do të zgjasë procesi i komplikuar i divorcit politik dhe ekonomik të Britanisë nga BE-ja”, thotë ai.
Investitori, ka paralajmëruar se pasojat Brexit janë të paevitueshme dhe padyshim një nga frikërat më të mëdha është edhe rreziku për shpërbërjen e bllokut 28 anëtarësh.
Në një shkrim në faqen e internetit të “Project Syndicate” Soros ka bërë thirrje për ristrukturim të thellë të BE-së, si mënyra e vetme për ta shpëtuar unionin.
Përpara referendumit për të dalë nga BE, Soros kishte paralajmëruar një situatë të vështirë financiare nëse Britanikët do votonin pro, ndërkohë që në komentet e tij të fundit, ai thotë se efektet e këtij vendimi do të dëmtojnë më shumë Britaninë.
“Britania aktualisht mund të jetë ose jo relativisht më e mirë sesa vendet e tjera pas largimit nga BE-ja, por ekonomia e saj dhe populli i saj pritet të vuajnë në mënyrë të konsiderueshme në periudha afatshkurtra dhe afatmesme”.
