Në një intervistë ekskluzive për emisionin Opinion në TV Klan, përballë gazetarit Blendi Fevziu, Kardinal Ernest Troshani ka rrëfyer një pjesë të padëgjuar më parë nga jeta e tij.
Papa Françesku, me 9 tetor, e shpalli Kardinal Dom Ernest Troshanin, për dëshminë e jetës së tij të krishterë.
Më 21 shtator 2014 ai dëshmoi para Papës vuajtjet e tij dhe të Kishës shqiptare përgjatë komunizmit.
Në mediat e gjithë botës, shkoi, përqafimi i përzemërt dhe përlotja e Papa Françeskut, në takim me Kardinalin e dytë shqiptar, pas Dom Ernest Koliqit.
Ky është një titull nderi që iu dha atij. Kjo do të thotë se Kardinal Ernest Troshani nuk merr pjesë në konklave, pasi ka kaluar moshën, por Kisha e nderon me këtë titull.
Kardinal Ernest Troshani ka lindur në Shkodër, më 18 tetor 1928. Mësimet e para i ka kryer në Shkodër, ndërsa të Mesmen në Kolegjin Françeskan dhe në Liceun “Illyricum”. U shugurua meshtar më 8 prill 1956 nga Imzot Ernest M. Çoba. Arrestohet më dt. 24 dhjetor 1963, Natën e Krishtlindjes gjatë celebrimit të Meshës në Kishën e Barbullushit. Dënohet me 18 vjet burg me motivacionin e famshëm të asaj kohe “agjitacion e propagandë”.
Burgun e vuan në Rubik, Vlorë, Laç (Krujë), Elbasan dhe pjesën dërrmuese 10 vjet në të tmerrshmin burg të Spaçit. Gjatë kohës para arrestimit ka shërbyer si famullitar në fshatrat Kabash, Pukë, Kukël, Gocaj, Barbullush, Mal i Jushit, Torovicë, Sumë. U lirua nga burgu në vitin 1981 mbasi e plotsoi krejtsisht dënimin.
E paharrueshme do të mbetet dëshmia e tij para Atit të Shenjt Françeskut gjatë vizitës së këtij të fundit në Tiranë, dëshmi e cila përloti jo vetëm Papën për realitetin e vuajtjeve të Dom Ernestit, por mbarë opinionin botëror.
Është pikërisht kjo arsyeja që papa Francesku shpalli gjatë lutjes së Engjullit të Zotit, Kardinal nderi.
