Tre ditë pas miratimit të aktit normativ “anti-KÇK”, policia ka nisur sekuestrimin e pasurive të grupeve kriminale.
Policia njofton se resorti “Golden” dhe një karburant në pronësi të “kokës” së krimit, Altin Hajri, janë vënë nën sekuestro dhe brenda 15 ditësh dosja e tij do të kalojë në SPAK.
Emisioni Opinion, ka trajtuar këtë të hënë pikërisht këtë paketë, ndërsa në rrjetet sociale është vendosur një sondazh.
“Operacioni special, ligji Anti-KÇK, a është e mundur të sekuestrohet pasuria krimineleve?”, ishte kjo pyetja e sondazhit, ku morrën pjesë 8 mijë votues.
70 përqind e votuesve nuk besojnë tek kjo paketë, ndërsa pjesa tjetër mendojnë se do të ketë sukses.
Paketa ligjore e prezantuar si Anti-KÇK nga kryeministri Edi Rama fuqizon kreun e Policisë së Shtetit dhe një strukturë speciale të quajtur “Operacioni Forca e Ligjit” me kompetenca të prokurorisë dhe gjykatës në marrjen e masave kufizuese personale dhe në sekuestrimin e pasurive për personat e dënuar dhe nën hetim./ Opinion.al
