Deklaratat e bëra nga ndërkombëtarët, gjatë këtyre dy ditëve, për çështjen e ish-ministrit të Brendshëm, Saimir Tahiri, kanë ardhur si mbështetje për organin e akuzës.
Ky është rezultati i sondazhit të mbrëmjes në Opinion.al, ku theksohet se mbi 66 përqind e votuesve mendojnë se ndërkombëtarët kanë reaguar në mbështetje të Prokurorisë, ndërsa 25 përqind e tyre, kanë votuar se ndërkombëtarët kanë reaguar në mbrotje të qeverisë dhe pothuajse 9 përqind e tyre mendojnë se ndërkombëtarët kanë reaguar në mbështetje të opozitës.
Zhvillimet e fundit në vend për çështjen “Tahiri” nuk kanë kaluar pa vëmendjen e ndërkombëtarëve. Sot ka ardhur një reagim nga BE për “çështjen Tahiri” dhe ambasadori amerikan në vend, Donald Lu. Ditën e djeshme ka reaguar edhe një autoritet i lartë i diplomacisë së SHBA-së, Hoyt Brian Yee.
Zëdhenësja e Komisionit Europian, Maja Koçijançiç, deklaroi se pritshmëria e Brukselit është që hetimi dhe të gjitha hapat e nevojshme të ndërmerren në përputhje me standardet ndërkombëtare. Ajo tha se Bashkimi Europian do ta monitorojë këtë çështje nga shumë afër.
Donald Lu tha se nëse Tahiri është i pafajshëm njerëzit duhet ta dinë këtë, nëse është fajtor ai duhet të përballet me drejtësinë.
Ambasadori u tregua me i drejtpërdrejtë kur tha se ne Shqipëri për shumë kohë janë dënuar njerëz për motive politike dhe në 27 vjet demokraci, politikanë nga i gjithë spektri, i kanë shpëtuar vazhdimisht drejtësisë, edhe pse kanë kryer krime të renda.
Hoyt Brian Yee: I pari është se ligji duhet të jetë i zbatueshëm për të gjithë njësoj, askush nuk duhet të jetë mbi ligjin, askush nuk mund të gëzojë imunitet nga ligji. Mbështesim plotësisht prokurorët dhe gjykatësit, të cilët ndjekin hetimet, dënimet, kudo që ato çojnë, në nivele të larta apo të mëposhtme të administratës.
Së dyti, ne mbështesim qeverinë, që jep shembullin. Qeveria është ajo e cila duhet të japë shembullin dhe të demonstrojë para qytetarëve se është e përkushtuar të luftojë korrupsionin, qofshin ata qytetarë, zyrtarë qeveritarë, të huaj, shqiptarë…dhe se Shqipëria është serioze në përpjekjet e saj për të luftuar korrupsionin.
Prokuroria për Krimet e Rënda, pas përfundimit të mbledhjes së Këshillit të mandateve për ish-ministrin Tahiri, është e shqetësuar për vijimin e procesit.
Përmes një deklarate të publikuar për mediat, Prokuroria jep alarmin se nxjerrja e sekretit hetimor vë në rrezik serioz personat që kanë dijeni për rrethanat e hetimit për grupin e strukturuar kriminal e me rrezikshmëri të lartë shoqërore si edhe intimidon e cenon integritetin fizik të këtyre personave.
Në seancën e Kuvendit të Shqipërisë, drejtuesi i Prokurorisë për Krime të Rënda, Besim Hajdarmataj, tërhoqi vëmendjen e Këshillit për të ruajtur sekretin e të dhënave hetimore. Por, pavarësisht se materialet, të konsideruara sekret hetimor u paraqitën pas nënshkrimit të deklaratës përkatëse për “ruajtjen e sekretit hetimor” nga ana e anëtarëve të Këshillit, sërish rezulton se të dhëna të ndryshme janë bërë publike.
Kërkesa për arrestimin dhe hetimin e ish-ministrit të Brendshëm, Saimir Tahiri nga Prokuroria e Krimeve të Rënda erdhi pas publikimit të dosjes së Gjykatës së Katanias, ku vulosi fatin e Moisi Habilajt dhe bandës së tij, përmend edhe emrin e ish-ministrit të Brendshëm, Saimir Tahiri.
Sipas gjykatësve dhe prokurorëve italianë, Habilaj përmend Tahirin si kushëririn e tij, si mbështetës të veprimtarisë në shkëmbim edhe të parave për fushatë.
