Shumica e francezëve, gjermanëve dhe britanikëve nuk e pëlqejnë presidentin amerikan Donald Trump. Madje sipas një sondazhi online të kryer nga qendra “Destin” më shumë se gjysma e francezëve, gjermanëve dhe britanikëve e përshkruajnë Trumpin si një “diktator”. Rreth 35% e të anketuarve francezë thanë se u pëlqente më shumë presidenti ukrainas Volodymyr Zelensky pas takimit të tij të paprecedentë në Washington me Donald Trump në fund të Shkurtit dhe vetëm 9% thanë se u pëlqen më pak tani.
Për më tepër, vetëm 25% e francezëve e konsiderojnë ende SHBA-në aleate, ndërsa më shumë se gjysma e francezëve, 57% “kanë vështirësi të karakterizojnë marrëdhëniet” midis Francës dhe Shteteve të Bashkuara. Lidhur me perspektivën e një lufte në Evropë në vitet e ardhshme, 6 nga 10 francezë e konsiderojnë të mundshme që Rusia të pushtojë vendet e tjera evropiane në vitet e ardhshme. Kjo bindje është edhe më e fortë në Britani dhe Poloni, përkatësisht 68% e të anketuarve besojnë se Europa do të përfshihet nga lufta, ndërsa në Gjermani kjo po zbret në 53.
Pothuajse 8 në 10 francezë, ose 76% thonë se janë të shqetësuar ose shumë të shqetësuar “për një zgjerim të konfliktit në Evropë në vitet e ardhshme”.
66% e polakëve dhe britanikëve kërkojnë një mbështetje të vazhdueshme për Ukrainën, edhe pa pjesëmarrjen e Shteteve të Bashkuara, ndërkohë në Francë përqindja përkatëse është 57% dhe në Gjermani 54%.
Lidhur me mundësinë e dërgimit të një force paqeruajtëse evropiane në Ukrainë pas arritjes së një marrëveshjeje për t’i dhënë fund luftës, 57% e të anketuarve në Britani, 44% në Francë, 41% në Gjermani dhe vetëm 27% në Poloni kanë një pikëpamje pozitive.
Tv Klan
