Socialistët nisën sot fushatën e tyre elektorale nga “Parku Olimpik” në Tiranë. E gjitha nisi me fjalën e Sekretarit të Përgjithshëm të PS-së, Taulant Balla.
“Më lejoni të them dy fjalë për ata që betohen se nuk do lejojnë të behën zgjedhjet. Është krim, dënohet. Nuk ka ende ndonjë budalla në këtë vend që ti besojë Lulit, Monikës e Saliut të marrë veten në qafë. PS është partia që bën shtet, është parti që bëri vendin me kushtetutë”, tha Balla.
Edhe në këtë ditë kryeministri Edi Rama tha se opozita nuk merr pjesë në zgjedhje se ka frikë nga humbja. Sipas tij zgjedhjet do të bëhen dhe kush i cenon ato do të marrin atë që jep ligji.
Edi Rama: Edhe këto zgjedhje të cilat janë braktisur nga kundërshtarët tanë politikë, janë pjesë e detyrimit tonë ndaj fëmijëve. Kundërshtarët tanë kanë frikë nga zgjedhjet ndaj bërtasin rrugëve. Kanë frikë ndaj gjykimi, ndaj kërcënojnë rrugëve se nuk do na lejojnë të votojmë. Sot nga kjo vendnisje e maratonës sonë iu them gjithë shqiptarëve se zgjedhjet do të bëhen, e kush mendon se do t’i pengojë duhet të mendohen dy herë. Ata që vendosën të dalin tre herë nga binarët e këtij sistemi nuk mund të vendosin për asgjë më shumë, përves vetes së tyre dhe për askënd tjetër. Zgjedhjet pa opozitën janë anti-demokratike janë vetëm kur opozita nuk lejohet të futet në zgjedhje, në të kundërt nuk janë aspak anti-demokratike.
Në kushtet kur nuk ka kundërshtarë politikë, edhe vetë kryeministri e pranoi se kjo betejë nuk do të jetë për vota. Por për Ramën fajin edhe për këtë situatë e ka vetëm një; ai është Sali Berisha, për të cilin hodhi akuza të forta ndërsa kreun e PD-së Lulzim Bashën e cilësoi si pinokun e tij.
Edi Rama: Kjo është një betejë e madhe me kundërshtarët e zgjedhjeve. Një betejë për t’i dhënë fund përgjithmonë një mënyre të ulet, një mënyrë të pabesë të bërit politikë duke u tallur me popullin. Kjo është një betejë për t’i dhënë fund çdo iluzioni ringjalljeje e një plaku të marrë, që ka djegur Shqipërinë për së gjalli dhe ka ardhur në pushtet duke na përçarë ne. Nuk na bën dot kërcënime me zjarrin e tij të urrejtjes dhe atë pinokun që ka atje në krye të partisë. Kjo është një betejë që do e bëjmë me këmbëngulje, aty ku kanë kundërshtarë dhe aty ku nuk kanë por kundërshtari është ai fantazma e të shkuarës që po jep shpirt dhe nuk po heq akoma dorë. Kjo nuk është një betejë për vota për zemrat dhe për mendjet e shqiptarëve.
Kryeministri shkoi dhe më tej, teksa kërcënoi ashpër ata që pengojnë zgjedhjet.
Edi Rama: Kush gënjehet nga vetëpërmbajtja jonë luan me zjarrin. Ne nuk duam të shohim asnjë njeri të zakonshëm të këtij vendi pas hekurave për hesap të plakut të marrë dhe një tufe frikacakësh. Prandaj do t’ju dalim borxhit të gjithëve gjatë këtyre 30 ditëve. Do t’ju tregojmë se ku janë kufijtë për shkeljen e zgjedhjeve. Do jemi shumë të vërtetë dhe do t’ju themi sa keq përfundon një njeri që dënohet për krimet zgjedhore, humb lirinë për lëvizjen e lirë në SHBA dhe BE.
Në 35 bashki socialistët nuk kanë rivalë, por sipas PS-së ka rëndësi parësore zhvillimi i këtyre zgjedhjeve më 30 qershor, përfshi realizimin e tyre me standarde.
Përmes një qarkoreje të brendshme dërguar shtabeve elektorale, ato u porositën të dokumentojnë me foto dhe video të gjithë ata, të cilët do të tentojnë të bllokojnë vullnetin e qytetarëve për të votuar./ Opinion.al
https://www.facebook.com/edirama.al/videos/2099401793690323/
