Në Spanjë është përmbyllur procesi i numërimit të votave, që ka shpallur fitues socialistët e Pedro Sanchez me 28,7% të votave, të përkthyera në 123 vende në Parlaement. Unidos Podemos, partia tjetër e qendrës së majtë ka fituar 14,3%, ose 42 vende në Parlament.
Për të siguruar mazhorancën, e cila kërkon minimalisht 176 mandate, me shumë mundësi Sanchez do të duhet të fusë në koalicion edhe partitë nacionaliste rajonale, si PNV (baske) dhe ERC (partia katalanase). Pjesëmarrja në këto votime ishte 75%, më e larta në dekadat e fundit.
Në këto zgjedhje, Partia Popullore e ish-kryeministrit Mariano Rajoy ka pësuar një rënie të ndjeshme në elektorat, edhe pse qeverisi Spanjën për shumë vite derisa u rrëzua përmes mocionit të mosbesimit në maj të vitit 2018. Në atë që përbën rezultatin e tyre më të keq në histori, Partia Popullore ka fituar vetëm 66 vende, një rënie drastike nga 137 vendet që kishte në legjislaturën e kaluar.
Që prej rënies së diktaturës në vitet ’70, për herë të parë pjesë e Parlamentit do të jetë një parti e ekstremit të djathtë. VOX ka arritur të fitojë 10,3% të votave, nga 0,2% që kishte marrë në zgjedhjet e fundit. Ata do të përfaqësohen në Parlament me 34 mandate. VOX kundërshton multikulturalizmin, emigracionin e pakufizuar dhe atë që ekstremistët e quajnë “feminizëm radikal”./Opinion.al
