Policia italiane ka goditur dy grupet e hajdutëve që vidhnin shtëpitë në zonat e Pisa, Pontedera, San Giuliano Terme dhe në Lucca të Italisë.
Banda e hajdutëve ishte e ndarë në dy grupe të veçanta nga njëra-tjetra, por qëllimi ishte i përbashkët.
E para, e quajtur nga hetuesit banda që përdorte koftën për të prerë hekurat e banesave, ishte e formuar nga 5 persona, tre prej tyre shqiptarë.
Ndërsa banda e dytë përbëhej nga disa romë të Rumanisë, maqedonas dhe kosovarë (në total dhjetë të dyshuar). Pjesë e grupit të hajdutëve ishin edhe të mitur.
Hetimet kanë treguar, mbështetur edhe në përgjimet e grupeve, se pjesëtarët e bandës ishin edhe të dhunshem, të gatshëm të bëjnë gjithcka për të arritur qëllimin.
Hetimet e policisë nuk kanë qenë të lehta për të arritur në dokumentimin me prova të veprimtarisë kriminale të grupeve. Ato nisën pas një vjedhjeje në një banesë të vjetër ku u morën 700 paund, verën e kaluar.
Policia ka folur për “përdorim të tepruar të çdo lloj lënde narkotike, që nga kokaina deri tek ketamina” që grupi i shqiptarëve e përdorte “për të marrë fuqi dhe për të rritur adrenalinën në nisje të aktivitetit kriminal fitimprurës”, thuhet në deklaratën e policisë.
As sistemet më të avancuara të sigurisë nuk mund të mbanin larg këtë grup banditësh nga vjedhjet e apartamenteve.
Një i ri shqiptar rezident në Pisa, konsiderohet si udhëheqësi i bandës së parë, i cili merrej me pjesëtaret e tjere te bandes duke u shpjeguar se si të shkonin për te vjedhur dhe çfarë të bënin.
Gjatë hetimit ishte veçanërisht e rëndësishme dëshmia e një personi i cili ka raportuar targën e një automjeti gjatë nje vjedhjeje, duke treguar praninë e tre personave në bord.
“Grupi shqiptar që kemi monitoruar – shpjegoi policia italiane – i përket një brezi emigrantësh shqiptarë të ardhur në Itali prej disa vjetesh, të cilët, në thelb, edhe pse të lindur në Shqipëri janë rritur që nga adoleshenca në Itali”.
“Le të shkojmë në plazh”, ishte mesazhi i koduar i grupit perbere prej shqiptareve për të njoftuar se ishin gati për të vjedhur.
Policia ka informuar se disa nga prindërit e shqiptarëve i dinin vjedhjet.
“Nëna e njërit prej tyre – kanë thënë karabinieret, – ka rekomanduar për të shitur në Shqipëri, një nga unazat prej diamanti të vjedhur kohët e fundit, ndërsa në një rast tjetër një unazë të vjedhur ai e ka bërë dhuratë për një vajzë italiane”.
Mbresëlënëse ishte lehtësia me të cilën ata kryenin vjedhjet në banesë, shumë shpesh në pasdite ose mbrëmje gjatë fundjavës, kur pronarët largoheshin nga shtëpia, shkruajnë mediat italiane./Panorama
