Ekipi i Skënderbeut, i cili u përjashtua dhjetë vjet nga kupat e Europës duke u gjobitur edhe me 1 milion euro, do të ketë gjyqin në Gjykatën e Arbitrazhit Sportiv (KAS) në prill të këtij viti. Sipas ABC News, korçarët do të kërkojnë zyrtarisht pafajësinë, por do të kënaqeshin edhe nëse dënimi ulet në tre vjet.
Sipas dokumentit të publikuar, seancat në Zvicër do të jenë më 16 dhe 17 prill dhe më pas gjykata do të vendosë nëse do të zbusë vendimin e UEFA-s apo do ta lërë në fuqi siç është. Skënderbeu u akuzua se trukoi shumë ndeshje në raundet eleminatore në Ligën e Kampionëve, si dhe në fazën e grupeve të Ligës së Europës.
Skënderbeu ka pajtuar studion më të njohur të avokatisë në Zvicër, të quajtur fillimisht De Pfifer, ndërsa tani e bashkuar nën emrin Kelehals Karrar, shkruan ABC News. Besohet se shpenzimi ka arritur në 500,000 euro, shenjë që presidenti Takaj ka shpresë se mund të marrë një rezultat pozitiv./Opinion.al
