Xhevahir Sukaj, sulmuesi shkodran i Partizanit u bë protagonist në sfidën që skuadra e tij zhvilloi të shtunën me Skënderbeun, teksa goditi mbrojtësin Arapi e u ndëshkua me karton të kuq, i pari për të në karrierë.
Sukaj, pas ndeshjes është shprehur se është i shokuar me atë çka ka ndodhur dhe nuk i jep dot shpjegim se si ka ndodhur. Madje ai ishte i bindur se nuk kishte goditur njeri, deri sa ka parë pamjet filmike.
“As vetë nuk e di se pse më ndodhi kjo. Jam realisht i shokuar dhe mendoj se kam bërë një gabim të madh që nuk më falet. Është kartoni i parë i kuq për mua si profesionist”.
“Sinqerisht nuk e kam parë fare se kush më markonte. Mbaj mend që jam bllokuar kur tentova të lëvizja dhe menjëherë reagova për t’ia hequr duart lojtarit që kisha afër. Me kokën ulur hapa dorën dhe ndodhi ajo çfarë ndodhi., Mirëpo, askush të mos
mendojë se unë këtë e kam bërë me qëllim. Ju betohem se, kur dola nga fusha, isha i bindur që nuk kisha goditur askënd, ndërsa kur e pashë në TV rastin, u shokova”.
Më tej ai shprehet se nuk ka qenë i nervozuar aspak por thjesht ka vepruar instiktivisht, pa parë asgjë.
“Nuk kam qenë aspak i nervozuar. Kundërshtari po më kapte me duar dhe tentova t’ia largoja. Isha me kokën poshtë dhe nuk kisha qëllim ta godisja kundërshtarin”.
Ai gjen rastin ti kërkojë falje Arapit si dhe të gjithë faktorëve në klubin e kuq.
“Në video që afër kisha Arapin, më vjen keq që e paskam goditur dhe i kërkoj ndjesë. Nuk kam asgjë me të, madje e kam mik”.
“Jam i ndërgjegjshëm që ai gjest është i dënueshëm, por, ju lutem, më besoni se asnjëherë nuk e kam menduar se do të reagoja ashtu. Unë nuk jam shquar për gjëra të tilla. Ndjej keqardhje që e lashë skuadrën me 10 lojtarë në momentin më të mirë të saj, ndaj dua ti kërkoj ndjesë ekipit, drejtuesve, trajnerit dhe tifozëve. Sepse nuk e meritonin ta bëja atë gjest. Gabimi im është i papranueshëm.”
Sa i takon dënimit nga Komisioni i Disiplinës, ai shprehet se nuk e meriton dënimin pasi nuk ka bëra asgjë qëllmisht.
“Nuk kam vrarë njeri, nuk besoj se meritoj dënim. Në futboll këto janë gjëra që ndodhin, e unë mora për herë të parë karton të kuq. Nuk më vjen mirë që mund të kryqëzohem, gjithsesi e pranoj gabimin”.
Ndërkohë, Sukaj premton që me golat e tij do ta ndihmojë ekipin për të dalë kampion, ndërsa thekson se ata janë pretendentët kryesorë për të fituar titullin, e për këtë ai është bindur edhe më shumë pikërisht pas përballjes me korçarët. (Panoramasport)
