Federata Shqiptare e Futbollit akoma nuk ka mbajtur një qëndrim mbi vendimin e Komisionit të Apelit në UEFA për pezullimin nga Kupat e Europës për Skënderbeun në sezonin 2016-2017.
Instuticioni më i lartë i futbollit europian, edhe njëherë ka treguar se nuk është në juridiksionin e saj për të vendosur mbi titullin kampion në Shqipëri të fituar nga Skënderbeu i pezulluar.
UEFA i është përgjigjur emaileve të “Panorama Sport”, për këtë çështje duke thënë: “Në lidhje me çështjen e titullit, miqësisht ju këshillojmë të pyesni në Federatën Shqiptare të Futbollit, pasi ajo është e lidhur me kampionatin shqiptar”.
Tjetër pyetje për të cilën UEFA është përgjigjur, ka të bëjë me ekipet që do të marrin pjesë në kompeticionet europiane, që pritet të përcaktohet në mesin e muajit qershor, por nuk ka një datë fikse.
“|Ne do të jemi në gjendje të konfirmojmë listën e klubeve që marrin pjesë në kompeticionet e UEFA-s në mesin e qershorit, por datë fikse nuk është vendosur ende”.
Një situatë që pak a shumë dihej, që i mban sërish peng klubet shqiptare, të paktën edhe për disa ditë, gjë që duket varet nga përfundimi i gjyqit që Skënderbeu ka nisur në CAS për pezullimin nga UEFA.
