Është zbardhur skenari që do të ndjekë Partia Demokratike për protestën e thirrur këtë të martë në orën 12:00, në një kohë kur mbahet dhe samiti BE-Ballkani Perëndimor në Tiranë dhe si rrjedhojë një pjesë e rrugëve kryesore të kryeqytetit janë bllokuar.
Mësohet se demokratët do të mblidhen nga rrugë të ndryshme të Tiranës në Sheshin Skënderbej apo dhe në vende të tjera.
Grumbullimi i tyre pritet të nisë rreth orës 11:30. Ndërkohë që në këtë orë do të nisë marshimi i simpatizantëve apo dhe përfaqësuesve të PD-së nga selia blu dhe më pas do të bashkohen të gjithë para ish-hotel Dajtit.
Ndërkaq në pamjet e siguruara nga Opinion.al duket se PD ka përgatitur gjithçka për protestën e sotme. Skena ku do të flasin protestuesit është ngritur mbi një kamioçinë lëvizëse.
Pavarësisht se Policia e Shtetit nuk i dha leje PD për të mbajtur protestën para kryeministrisë, kreu i PD, Sali Berisha nuk u tërhoq por bëri thirrje për pjesëmarrje masive.
