Eris Doko, bashkëjetuesi i njërës prej sekserëve të fondacionit “Besa”, Orkida Driza,ka thënë sot se ata janë mashtruar nga drejtuesit e fondacionit dhe se ata kanë kryer thjeshtë rolin e sekserit.
“Skema ishte e thjeshtë, na sillni vetëm certifikata dhe fotokopje, merrni një shumë prej 300 mijë lekësh të vjetra dhe brenda vitit mbyllej. Ketë shumë e merrnin te Fondi Besa. Nuk e dija që ishte skemë mashtruese”, tha Doko.
Ai deklaroi gjithashtu se përfitonte 20 mijë lekë të rinj për çdo person që dërgonte në fondacion. Pra mediave ai pohoi se brenda një viti ka çuar më shumë se 100 persona te “Besa”.
Doko tha se ai ishte kontaktuar nga një person me emrin Dritan i cili merrte dhe çonte lekët te drejtoresha
“Dritani tha çfarë të keni të afërm sillni se është pa probleme, brenda vitit mbyllet. Unë si Dritan e njihja, vinte që merrte lekët dhe i çonte te drejtoresha”, deklaroi Eris Doko. Ai shtoi se ka patur shumë sekser që punonin për “Besën”.
Sa i përket Orkida Drizës, ajo ka deklaruar se është e gatshme të bashkëpunojë me drejtësinë, duke pretenduar se është përdorur në skemën fiktive.
Skema e mashtrimit në fondacionin “Besa”, me kredidhënie fiktive, rezulton të ketë prekur mbi 800 persona. Rreth 3.7 milionë euro është shumë e përfituar. /Opinion.al
