Ministrja e Shëndetësisë Albana Koçiu ka folur në interpelancën e kërkuar nga opozita pas skandalit të Onkologjikut.
Në fjalën e saj, Koçiu tha se kushdo që provohet fajtor, nuk ka punë me këtë qeveri.
Ajo thekson se këtë qeverisje faji ka emër e fytyrë dhe jo përgjithësime.
“Jemi pozicionuar qartazi qoftë politikisht, por edhe përmes akteve të ndërmarra. Qasja jonë është deviza ; punë dhe nder. Në këtë qeverisje faji ka emër e fytyrë dhe jo përgjithësime. Ne kemi vendosur një standard; që kushdo që provohet fajtor, nuk ka punë me këtë qeveri e këtë familje politike. Ky standard vlen edhe për mjekët e vendosur nën akuzë secili prej tyre duhet të përgjigjet për çdo veprim të kryer. Në vlerësimin tim e të qeverisë përbën faj të patolerueshëm në nivelet e një krimi që hyn në veprat kriminale”.
Ajo tha se ngjarja e Onkologjikut po politizohet.
“Në lidhje me zullumin që doli në dritë në onkologjik, Ministria e Shëndetësisë reagoi menjëherë dhe bëri thirrje publike për të zbardhur ngjarjen. Inkurajoj drejtësinë të hetojë me zero tolerancë dhe të nxjerrin para përgjegjësisë ligjore çdo individ që ka abuzuar me misionin e shenjtë të mjekut. Do të jem në mbrojtje të çdo anëtari të spitalit që misionin e ka të shenjtë dhe bluzën e bardhë e ka të panjollosur. Tentativa për të politizuar ngjarjen është akt i shëmtuar, por do të rezultojë edhe i dështuar”.
