Sekretarja për Marrëdhëniet me Publikun në Partinë Demokratike, Grida Duma nëpërmjet një replike me kryeministrin Rama, ka denoncuar faktin se farmacitë shqiptare vazhdojnë të shesin ilaçe të skaduara.
Duma shkruan, se shqetësimi është raportuar nga shumë pacientë, pasi disa produkte, shiten pa “bar code-t” përkatëse, që vërtetojnë certifikimin e tyre në lidhje me skadencën.
Disa nga ilaçet që shiten pa “bar cod”, janë Leponex , Amoxicilina, Enalapril dhe Atenolol.
Sipas saj, ata bëjnë me dije, edhe pse janë ankuar në Ministrinë e Shëndetësisë, askush nuk ka shfaqur interesim për t’i takuar.
Ajo thekson se Leponex është një ilaç që përdoret për sëmundjet mendore, e madje individët që kanë nevojë për të nëse është i skaduar mund të shkaktojnë edhe tragjedi, krime sociale.
Ky lloj ilaçi është e pamundur të blihet jashtë vendit sepse kërkohet receta e mjekut që e njeh farmacisti jashtë Shqipërisë. E të sëmurët tonë e marrin të skaduar gjë që në këtë rast provohet që në etiketë nga mungesa e elementit të certifikimit.
Amoxicilina, antibiotiku i parë në listën e ilaçeve, nuk bën asnjë efekt, por as ka mundësi të marrësh një tjetër nga lista se ligji e do që pasi të provohet se nuk jep efekt mund të merret i dyti! Pasi magazinat e ilaçeve të skaduara të kalojnë në trupat e fëmijve, e të provohen që s’bëjnë efekt mund të nisim me të dytat më pak të skaduara. Madje edhe një ilaç i skaduar si Amoxicilina mund të merret vetëm pas katër ditësh kur vjen vërtetimi nga antibiograma.
Enalapril dhe Atenolol, e gjithë mosha e tretë që vuan me tension është e detyruar ti marrë, askush nuk i merr më, asnjë efekt nuk bëjnë, kush e provon të njëjtin ilaç të blerë në itali, Gjermani, e kudo në perëndim kupton që ska pasur kurrë mjekim me ato që merrte në Shqipëri.
Risi e skandalit është se së fundmi është hequr plotësisht vitamina D që është e domosdoshme për profilaksinë ndaj raketizmit, pra fëmijët që lindin raketikë nuk munden më të kenë as mjekim vitaminoz nga lista e rimbursimeve. Mjaft të shikohet lista e 2015 dhe lista e 2017 dhe duket qartë që mungon.
