Prokuroria ka administruar dhe marrë pamjet filmike të bizneseve që ndodhen në rrugën “Fortuzi” dhe pranë Universitetit Politeknik, për datat 11-17 Prill kur kanë ndodhur edhe kërcënimet ndaj rektorit të UT-së, Mynyr Koni dhe Dhori Kules.
Sipas pamjeve filmike, dyshohet se persona nga banda e Shullazit e kanë goditur me grushte Mynyr Konin, teksa i janë afruar më 15 prill në darkë, te rruga “Fortuzi”.
Konit iu afruan disa persona dhe i kërkuan që të hipte në mjetin e tyre, por ky i fundit u ka bërë pyetje se cilët janë ata dhe se çfarë kërkojnë, raporton panorama.
Debati ka vazhduar për disa minuta, deri sa njëri nga anëtarët e bandës së Shullazit e ka goditur në fytyrë Konin dhe ky i fundit u nënshtrua.
Pasi ka udhëtuar disa metra me kërcënuesit, Koni ka zbritur nga mjeti i tyre duke u premtuar atyre se do të tërhiqej nga gara.
Prokuroria tashmë po analizon pamjet për të identifikuar personat që kanë kërcënuar Konin dhe Kulen për të parë nëse Shullazi ishte mes tyre.
