Prej mesditës së të dieles media zien për lajmin e bujshëm të mbërritjes në portin e Durrësit të “Toyota Yaris” me 3.5 milionë euro brenda.
Ngjarja e rëndë kriminale është e mbushur me mister! Edhe pse kanë kaluar 24 orë, Policia e Shtetit dhe as Prokuroria e Përgjithshme nuk kanë nisur njoftim për mediat për këtë skandal të madh.
Sa është shuma e saktë e eurove që u kap në port?
Kush është porositësi i makinave brenda të cilave erdhën me thasë miliona euro?
Si u sinjalizua për praninë e eurove në makinat që vinin nga Belgjika. Kush po i ndjek hetimet?
Janë një mori pyetjesh që mediat por dhe opinioni publik kërkojnë të informohen nga institucionet ligjzbatuese në vend.
Për ngjarjen ka folur deri më tani vetëm opozita. Lulzim Basha e ka drejtuar gishtin tek Edi Rama dhe Taulant Balla.
“Paratë janë të një prej bandave më të rrezikshme të trafikut të drogës, aktive kryesisht në zonën e Elbasanit, por edhe të gjithë Shqipërisë. Taulant Balla kishte marrëveshje për të garantuar hyrjen e këtyre parave pa problem në Shqipëri. E treta, policia shqiptare ka qenë nën presionin e një prej partnerëve tanë për të vepruar. Është një nga vendet partnere, i cili është skeptik përsa i përket kushteve të Shqipërisë për integrimin në veçanti kundër krimit dhe korrupsionit”, tha ai.
Sakaq, Kryeministri hesht! Ai doli sot para publikut të ERTV-së për të përuruar bustin e Eqerem Cabejt por ‘ska gjetur kohën ti përgjigjet opozitës për miliona eurot që erdhën papritur në port nga Belgjika.
Ndërsa Taulant Balla, anuloi një konference që kishte paralajmëruar për mediat në selinë e PS, duke u mjaftuar me një status ironik në facebook. “O Babale! Mjere kush te beson ty akoma dhe taksirati yne qe kemi perballe nje opozite qe e ktheve ne teater babalesh!”, shkruan Taulant Balla, duke mos thënë asnjë fjalë për thasët me euro që u kapën të dielën në portin e Durrësit.
/Opinion.al
