Një aksident me pasojë plagosjen e një nëne me foshnjën e saj 7-muajsh ndodhi dje në lagjen nr. 4 në Durrës, pranë një qendre tregtare, ndërsa sot policia jep disa detaje më shumë rreth ngjarjes.
Sipas policisë së Durrësit, pas aksidentit ka ndodhur edhe një episod dhune me të ëmën e të aksidentuarës, e cila është goditur me shuplakë nga babai i djalit që e përplasi me makinë.
Nën drejtimin e mjetit tip “Benz” fuoristradë ishte shtetasi Gj.K. banues në Durrës, vetëm 17 vjeç dhe i papajisur me patentë. Në makinë me të ndodhej edhe i ati, shtetasi A.K. 54 vjeç, i cili akuzohet se pas aksidentit ka ushtruar dhunë.
“Më datë 07.08.2017, rreth orës 20:00, në rrugën “Skënderbej” shtetasi Gj.K. duke drejtuar mjetin tip “Benz” fuoristradë, pa leje drejtimi ka aksidentuar shtetasen E.B. 31 vjeçe dhe fëmijën e saj A.A. 7-muajsh, të cilët ndodhen në spital jashtë rrezikut për jetën.
Shtetasi A.K. pas aksidentit ka goditur me shuplakë shtetasen N.B. 62 vjeçe, nëna e shtetases E.B.”, sqaron policia.
I biri 17-vjeçar u arrestua nën akuzën e dy veprave penale “Shkelja e rregullave të qarkullimit rrugor” dhe “Drejtimi i automjeteve në mënyrë të parregullt”, ndërsa ndaj të atit ka nisur procedimi penal në gjendje të lirë për veprën “Dëmtime të tjera me dashje”.
