Sulmi me armë zjarri nga një 18 vjeçar në një qendër tregtare u mori jetën 9 personave, mes të cilëve tre me origjinë shqiptare.
Dijamant Zabergja, Armela Segashit dhe Sabina Sulaj mbetën viktima të sulmit “terrorist”.
Ndonëse janë shqiptarë të Kosovës, në një deklaratë të sajën, Ministria e Jashtme nuk nguroi të pohonte se në Mynih nuk kishte asnjë shqiptar të vrarë.
Ndërkohë, Sabina Sulaj, ishte fëmijë e një nëne shqiptare dhe babai Kosovar.
Nëna e saj , Lola Sulaj ishte me origjinë nga Rrësheni, që do të thotë se lidhja e vajzës së ndjerë më Shqipërinë, ishte më e fortë se sa mund të dukej, ndonëse ajo gëzonte shtetësinë Kosovare. Pra kombësia e vajzës është shqiptare.
Deklarata e pamatur e Ministrisë së Jashtme bie ndesh edhe me deklaratën e shefit të qeverisë, Kryeministrit Edi Rama, i cili shprehte në facebook trishtimin e thellë për jetët e humbura të shqiptarëve.
Cila prej dy institucioneve nuk di dallimin mes kombësisë dhe shtetësisë? Cila përgënjeshtron tjetrën? Dhe si mund të jenë kaq naive, kaq joserioze, të ndeshura me njëra tjetrën, pohimet e dy institucioneve kaq të rëndësishme, në çështje serioze si jeta e bashkë-kombësave tanë?
