Ditën e sotme një i ri nga Elbasani u shpreh se nëna e tij e infektuar me COVID-19 nuk është shtruar në spitalin “Shefqet Ndroqi”, pasi nuk ka vende dhe për këtë arsye ajo është detyruar të qendrojë në autoambulancë.
Lidhur me këtë rast ka reaguar kryetari i Partisë Demokratike, Lulzim Basha, i cili shprehet se kjo është e vërteta që po përjetojnë të sëmurët me COVID dhe familjarët e tyre.
Basha shkruan në “Facebook” se i druhej kësaj situate, prandaj PD kishte kërkuar që prej fillim që të merreshin masa.
LEXO EDHE: I riu mes lotësh tek Sanatoriumi: Po më vdes nëna në ambulancë, s’ka vende
“Jam shumë i tronditur nga këto pamje. Dhimbja e këtij djali që lufton për të shpëtuar jetën e nënës së tij, të thyen zemrën. Kjo është tragjikisht, e vërteta e tmerrshme që po përjetojnë të sëmurët me covid dhe familjarët e tyre. Nuk duhet të kishim ardhur në këtë pikë! Kësaj i druheshim, prandaj kërkuam prej fillimit të merreshin masa serioze dhe të bëhej gjithçka për ti dalë të keqes para. Boll më me propagandë dhe gënjeshtra. Janë jetë njerëzish që kur ikin nuk kthehen më!”-shkruan Basha./ Opinion.al
