Mazhoranca dhe opozita duket se bashkohen në tezën për çuarjen e vendit drejt zgjedhjeve të parakohshme në mungesë të arritjes së një konsensusi për realizimin e reformës në drejtësi.
Por, ndërsa socialistët i kërkojnë këto zgjedhje si një rrugëdalje në rast se nuk miratohet reforma në drejtësi, demokratët e kanë kërkesë të përhershme për të larguar këtë qeveri, dhe jo vetëm për reformën.
Edhe pse për nënkryetarin e Partisë Demokratike, Edi Paloka, vetëm një Parlament i dale nga zgjedhjet e parakohëshme mund ta realizojë reformimin e sistemit të drejtësi.
Qendrimi i PS
Në një status në rrjetin social “Facebook”, nënkryetari i grupit parlamentar të PSsë, Erjon Braçe shkroi dje: “Pushteti, politik, legjislativ apo ekzekutiv, nuk vlen pa një pushtet të drejtë, të ndershëm, profesional dhe efikas, të drejtësisë!”. “Pushteti politik, legjislativ, ekzekutiv na duhet për reformën! Pushtet pa reformën është ky që kemi. Për një grusht njerëzish që kurrë nuk u bënë të barabartë para ligjit si gjithkush, siç thotë Kushtetuta, mund të mjaftojë, për ne jo! Nuk mjafton për shoqërinë shqiptare!”, – shkroi dje Braçe, duke nënkuptuar qartë se, në rast se reforma nuk miratohet, atëherë pushteti i socialistëve nuk ka më vlerë.
Qendrimi i PD
Nga ana tjetër, kryetari i grupit parlamentar të PDsë, Edi Paloka u shpreh po dje se “zgjedhjet e parakohshme janë të domosdoshme, por jo se i kërkon Majko apo kërcënon Rama, por, sepse vendi ka shkuar në një pikë krize të pakthyeshme”. Sipas Palokës, deklaratat e Majkos për zgjedhje të parakohshme tregojnë për “një luftë të brendshme midis tyre”. “Prej kohësh, Rama kërcënon Metën dhe Meta Ramën.
Numri dy i PDsë, Edi Paloka është dakord me Pandeli Majkon për zgjedhjet e parakohshme, por për një motiv tjetër. I pyetur nëse reforma është proces politik apo teknik, Paloka thotë se ka edhe një skenar të tretë. Mes zgjedhjeve të parakohshme dhe reformës në drejtësi, Paloka zgjedh: “Ka edhe një rrugë tjetër. Ka zgjedhje dhe pastaj reformë. Sepse, përderisa kemi qartazi vullnet të munguar nga Edi Rama për të bërë edhe reformën në drejtësi, pse jo, këtë reformë mund ta bëjë parlamenti i ardhshëm me një vullnet të plotë”.
Por për kreun e grupit parlamentar të opozitës, edhe për zgjedhjet ka një kusht të panegociueshëm, qeveri tjetër që t’i organizojë ato. “Edi Rama duhet të largohet që shqiptarët të zhvillojnë zgjedhje të lira e të ndershme, dhe më pas të kenë një qeveri që realisht të punojë për interesat e tyre”, – u shpreh kreu i grupit parlamentar të PDsë. Dy ditë më parë, ishkryeministri socialist, Pandeli Majko hodhi në publik, mendimin e tij se nëse reforma në drejtësi nuk miratohet, atëherë janë të nevojshme zgjedhjet e parakohëshme./GSH
