Stina e dimrit dhe bashkëqarkullimi i shumë virozave dhe gripit ka sjellë një situatë të rënduar shëndetësore për popullatën.
Specialistët e ISHP thonë se arsyeja se përse disa persona po e kalojnë rëndë gripin apo virozat, është fakti i rënies së imunitetit dhe mundësisë së prekjes nga virozat e ndryshme në qarkullim.
“Është një situatë e miksuar, me paraqitjen e disa viruseve në qarkullim. Kemi gripin e tipit A dhe B, kemi Covid 19, kemi virusin respirator sensicial, nga metapneumovirusi asnjë rast i dyshuar në këto momente, por kuptohet, jemi në sezonin e dimrit, bashkëqarkullimi i virozave, sjell një rëndesi jo vetëm në aspektin epidemiologjik, por edhe në aspektin klinik të formave qoftë të lehta, të mesme apo të rënda”, shprehet Eugena Tomini, drejtore e ISHP.
Nga afro 11 100 infeksione respiratore, në vend po dominon gripi.
“Mbizotërojnë insfeksionet respiratore të sipërme, por dominon gripi dhe virusi respirator sensicial. Theksojmë vaksinim ndaj gripit, minimizojnë një formë të rëndë të prekjes nga virozat”, tha Tomini.
Sipas specialsitëve, popullata nuk duhet të neglizhojë asnjë shenjë të virozave
“Nuk duhen neglizhuar shenjat. Sigurisht ka një klinikë që është e shprehur me shenja të përgjithshme, që viruset e paraqesin të ngjashme me njëri-tjetrin, por ka edhe forma ku kolla ngelet për një periudhë të gjatë kohe 2-3 javë, por që shpesh pacientit i rëndon situatën edhe të sëmundjeve bashkëshoqëruese, por edhe të shenjave klinike, dhe duket sikur një lloj viroze nuk po zhduket në asnjë moment”, thekson Tomini.
Bluzat e bardha rekomandojnë shmangien e përdorimit të antibiotikëve pa kriter. Sipas tyre është e rëndësishme kontakti me mjekun e familjes për çdo shenjë klinikë, kryesisht për të moshuarit dhe fëmijët, grupmosha më e prekur nga këto infeksione./ Tv Klan
