Një grua është viktima e parë e zjarrit që ka pushtuar verilindjen e Atikës për të tretën ditë.
Gruaja, e cila punonte në një dyqan artizanati në Patima Chalandriou, u bllokua në ndërtesën që u dogj deri në themel nga zjarri.
Informacionet e raportuara thanë se trupi i gruas 60-vjeçare, u gjet i djegur në tualetin e biznesit ku ajo besohet se ishte përpjekur të strehohej kur kuptoi se zjarri në ndërtesë ishte përhapur.
Vatrat më të mëdha të zjarreve janë në Pentelis, në Dionisos, Halandri, Vrilissia si dhe në Maratonë.
Sipas autoriteteve helene bëhet fjalë për frontin më të fuqishëm të zjarrit për këtë vit, që ka detyruar qindra njerëz të largohen, pasi ka djegur dhjetëra shtëpi, pemë dhe makina gjatë natës.
Aktualisht në këtë front operojnë 670 zjarrfikës, të ndihmuar nga 183 automjete zjarrfikëse, të mbështetur me 17 avionë dhe 18 helikopterë që hedhin ujë nga ajri.
