Vendi nuk gjen qetësi nga zjarret. Një zjarr i përmasave të mëdha në fshatin Kakavijë ka bllokuar edhe punën në doganë, duke shkaktuar radhë të gjata.
Për shkak të tymit, për gati dy orë u bllokua kalimi në pikën kufitare të Kakavijës.
Era ka favorizuar flakët, duke e përhapur zjarrin në pjesën veriore të fshatit, duke rrezikuar edhe jetën e banorëve.
Në vendngjarje kanë shkuar 7 zjarrfikëse nga Qarku i Gjirokastrës, të cilat kanë bërë të mundur të nxjerrin nga shtëpitë disa të moshuar, banesat e të cilëve u përfshinë nga flakët. Sipas kryetarit të bashkisë Dropull, ka dëme në banesa.
Situata në Kakavijë është normalizuar, pasi në ndihmë të forcave zjarrfikëse kanë ardhur dy avionë nga pala greke, të cilët kanë bërë të mundur vënien në kontroll të flakëve.
Një tjetër zjarr i fuqishëm ka përfshirë dy fshatra të Gjirokastrës, fshatrat Prongji dhe Kardhiq. Zjarri ka rrezikuar edhe zonat e banuara.
Situatë shqetësuese është edhe në Delvinë. Ndërhyrja nga toka është bërë shumë e vështirë për shkak të terrenit të thepisur, ndaj autoritetet kanë angazhuar edhe dy helikopterë për të ndihmuar nga ajri në operacionin e shuarjes së flakëve.
Po ashtu, një tjetër vatër zjarri është edhe ajo në Kamicë të Malësisë së Madhe, ku po punohet për izolimin dhe shuarjen e zjarrit.
Ndërkohë që situata është normalizuar në malin mbi fshatin Dukat në Vlorë. Sipas autoriteteve, të dy vatrat në këtë zonë janë drejt shuarjes totale.
Sipas emergjencave civile, vatra aktive ka edhe në qarqet e Shkodrës, Lezhës, Elbasanit, si dhe në Parkun Kombëtar të Lurës.
Klan News
