Operatori i Shpërndarjes së Energjisë Elektrike siguron se natën e ndërrimit të viteve “nuk do të ketë surpriza”.
Sipas kësaj kompanie energjia elektrike për ditën e fundit të vitit është e siguruar, ndërsa është bërë dhe blerja e sasisë së energjisë prej 80 mijë megavat orë për ditët e para të Janarit. Furnizimi me energji për javën e parë i ka kushtuar kompanisë 5 milionë euro me një çmim prej 62.8 eurosh për megavat Orë.
Ministrja, Belinda Balluku ka mbledhur drejtuesit e OSHEE dhe Operatorit të Transmetimit, ku i ka kërkuar marrjen e masave të plota për të përballuar ngarkesën e natës së ndërrimit të viteve.
Nga ana e Operatorit të Shpërndarjes së energjisë thuhet se janë vënë 1700 punonjës në grupet e terrenit, të cilët në pikat ku rrjeti është i vjetër e problematik do të marrin masa për të riparuar në kohë të shpejtë nëse ndodh një defekt. Administratori i OSHEE-së tha se temperaturat e ulëta e bëjnë më të vështirë punën./ Opinion.al
