Gjykata e Korçës, me kërkesë të Prokurorisë, ka caktuar masën e sigurisë “arrest në burg” për shtetasen Kejsi Spaillari, 24 vjeç e cila akuzohet për vrasjen e ish të dashurit të saj, Antonio Karafili, ngjarje kjo e ndodhur 7 vite më parë në Voskopojë.
Ajo sakaq është shpallur në kërkim nga blutë.
Përgjatë hetimeve, u provua se Kejsi Spaillari, së bashku me një person tjetër, Rexhep Vathi, janë implikuar në vrasjen e 18-vjeçarit Karafili, i cili u gjet i varur në pemë me një çarçaf.
Ngjarja fillimisht u regjistrua dhe u hetua si vetëvrasje, për të zbuluar më pas se ai ishte vrarë nga e dashura e tij e asokohe dhe u inskenua si një vetëvarje.
Nga indiciet dhe provat biologjike, ka rezultuar se Spaillari dhe Vathi kanë mbytur me çarçaf Antonio Karafilin, e më pas e kanë varur në pemë, duke inskenuar kështu vetëvrasjen e tij.
Motivi i krimit dyshohet të jetë lidhja paralele që Kejsi Spaillari kishte me viktimen dhe Rexhep Vathin. Pas krimit, Spaillari emigroi ne Kanada,ndërsa në gusht të 2024 Rexhep Vathi vrau veten.
Ndaj së resë rendon akuza e vrasjes me dashje, e kryer në bashkëpunim.
Pas kësaj, Prokuroria e Korçës pritet të procedojë me urdhër-arrest ndërkombëtar për Kejsi Spaillarin, e cila ndodhet në Kanada dhe ka krijuar familjen e saj.
Emisioni investigative “Stop” e ka trajtuar gjithnjë këtë rast me prioritet, por kjo çështje u zvarrit nga shumë prokurorë. Prokurori i fundit urdhëroi një riekspertim të tretë nga Instituti i Mjekësisë Ligjore. Edhe pas eksperimentit në terren, shumë fakte nga Mjekësia Ligjore sërish u sfumuan, duke e lënë si vetëvarje atë që ka ndodhur me të riun e ndjerë. E vetmja zgjidhje që kjo çështje të zbardhet, u pa dërgimi jashtë Shqipërisë i bërjes së akt-ekspertimit përfundimtar, i pandikuar nga Mjekësia Ligjore në Shqipëri.
Prokurorja e katërt që hetoi këtë çështje, Vasjana Postoli, e dërgoi kryerjen e një akt-ekspertimi në Austri. Procedura vonoi 2 vjet dhe në 2024-ën, konkluzionet mbërrijnë në Korçë. Rezultati i dokumentit të Prof. Dr. Christian Reiter mbi këtë ngjarje, bazuar në informacionin e dërguar nga Organi i Akuzës në Shqipëri është se 18-vjeçari Antonio Karafili është vetëvrarë, pasi nuk vërtetohet prania e një personi të tretë. Ajo që e bën të dyshimtë këtë raport, është mungesa e firmave dhe vulave që mungojnë në fletët e aktit. Firma dhe vula e mjekut janë vetëm në faqen e parë dhe të fundit të aktit.
Sakaq, Dr. Christian Reiter, ka mohuar ekspertizën me firmën e tij. Prindërit e Antonios së ndjerë dyshonin se informacioni që u është dërguar ekspertëve austriakë mund të ketë qenë qëllimisht i cunguar. Në një bisedë mes kunatës së viktimës dhe ekspertit austriak, ky i fundit deklaron se nuk e ka fare idenë e kësaj çështjeje nga Shqipëria.
Prof.Dr.Christian Reiter: Pse po më merr prapë në telefon?
Kunata e viktimës: Të lutem, se më duhen përgjigje për këtë rast!
Prof.Dr.Christian Reiter: Unë nuk kam fare të bëj me këtë gjë. Nëse mendon se unë jam personi i duhur për të folur për këtë gjë, okej.
Kunata e viktimës: Po, të lutem, a mundet të më dëgjosh? Të lutem, a mund të më dëgjosh vetëm një sekondë? Pra ty nuk të kujton asgjë Antonio Karafili? Nuk ke asnjë dijeni mbi këtë çështje?
Prof.Dr.Christian Reiter: Jo, nuk di asgjë për këtë.
Kunata e viktimës: Nuk di asgjë për këtë?
Prof.Dr.Christian Reiter: Jo!
Kunata e viktimës: Ok! Shumë faleminderit!
/tvklan.al
