Veshjet të cilat mbajnë simbolin shqiptar – shqiponjën dykrenore, janë bërë të famshme në Brazil.
Këto rroba kanë filluar të pëlqehen edhe nga personalitetet e njohura në atë vend, sikundër ish-sulmuesi i Milanit, Alexandro Pato, i cili publikoi kohë më parë në instagramin e tij një fotografi në të cilën luante me qentë, ndërsa mbante të veshur një bluzë të bardhë me shqiponjën në gjoks.
Disa nga komentuesit reaguan menjëherë për të treguar se bëhet fjalë për simbolin shqiptar. Madje ka pasur të tillë që kanë shkruar se “Pato dëshiron të bëhet shqiptar”.
E vërteta është se shqiponja dykrenore e flamurit tonë kombëtar është simbol firmës së njohur të veshjeve në Brazil – “Cavalera”.
Nëse hapni faqen e internetit të kësaj kompanie do të shihni shqiponjën që është emblema bazë e tyre. Po ashtu, në të gjitha veshjet e kësaj firme dallohet simboli i shqiponjës, identike me atë të flamurit shqiptar. Veshjet e dizajnuara nga kjo firmë, janë për t’u veshur çdo ditë dhe vishen kryesisht nga moshat e reja.
Kompania “Cavalera” është themeluar në vitet e nëntëdhjeta nga ish-bateristi i metal bendit “Sepultura”, Igor Graziano Cavalera.
