Në datën 19 maj, dy javë më parë, në Prokurorinë Shqiptare mbërriti një kallzim që vinte nga Ministria e Brendshme. Sipas tij, në zyrën e Ministrit të Brendshëm të Shqipërisë, Saimir Tahiri ishin gjetur pajisje përgjimi. Lajmi edhe pse u mbajt sekret nga Prokuroria dhe Ministria e Brendshme, u bë publik të nesërmen nga ish kryeministri Sali Berisha në FB. Edhe pse Berisha e trajtonte me nota tallëse dhe groteske, edhe pse bënte aludime për llojin e përgjimit, lajmi ishte i vërtetë. Për 2 javë ai u mbajt sekret, por opinion.al ka arritur të sigurojë detaje.
Pajisja e vogël e përgjimit, e tipit audio, është gjetur jo në zyrën, por në paradhomën e Ministrit. Ajo ka qenë e vendosur nën makinën që bën përpunimin dhe prerjen e letrave të panevojshme, një pajisje që me gjasë është sjellë vonë në paradhomë. Për arsye të rikonstruksionit të godinës së Ministrisë së Brendshme, Tahiri po qëndron në një zyrë të improvizuar në ambientet e Gardës së republikës. Opinion.al ka mësuar se pajisja ka një rreze perceptimi prej 20 metrash që do të thotë mbulon pa asnjë vështirësi çdo detaj audio që ndodh në zyrën e ministrit. Nuk dihet nëse ajo regjistrohet diku tjetër përmes valëve transmetuese, apo e ka regjistratorin në vetvete. Duket se pajisja ju ka shpërtuar kontrolleve rutinë që bëhen çdo javë apo çdo 10 ditë në zyrat e zyrtarëve të lartë të shtetit. Nuk dihet nëse ajo është zbuluar nga vetë Tahiri, apo nga një pajisje e sofistikuar që ka hyrë në Shqipëri me urdhër të Prokurorisë për të verfikuar zyrat e shtetit. Pak kohë më parë ka pasur dyshime se me një pajisje të sofistikuar private është përgjuar edhe Kryeministri Rama. po për këtë ende nuk ka konfirmim. Burime të pakonfirmuara deklarojnë se dyshimet më të mëdha, janë për përgjime të brendshme, të vendosur nga vetë zyrtarët e ministrisë.
Kjo është hera e parë që përgjimet ngjiten në nivele kaq të larta. Kjo mbase edhe pas talentit të jashtëzakonshmë dhe pasionit që LSI dhe një pjesë e PS kanë në artin e përgjimit.
