Pak ditë më parë Gjykata e Tiranës liroi nga burgu Ervis Martinajn, i cili u arrestua në lidhje me ngjarjen e ndodhur më 4 tetorit 2018 në ish-bllok.
Në këtë ngjarje mbeti i vrarë Fabian Gaxha dhe u plagosën Ervis Martinaj dhe Eljon Hato. Pas ngjarjes, Martinaj qëndroi në paraburgim deri në 3 maj 2019, me akuzën “vrasje në rrethana cilësuese”.
Por, Gjykata i riktheu lirinë kundrejt një garancie pasurore prej 5 milionë lekësh.
Sipas A2 CNN, gjyqtari Artan Gjermeni argumenton se masa “arrest në burg” nuk i përgjigjet më dyshimeve të prokurorisë drejt tij.
Pasi kaluan tetë muaj nga ngjarja, Gjykata është shprehur se Prokuroria ka vetëm një provë kundër Martinajt, sms-në e shkëmbyer mes tij dhe një personi me emrin “Aldo”, ku i shkruan: “Lidhu me çun… Afrohu… Me armë”.
Por, pavarësisht kësaj prove, gjyqtari e ka argumentuar se me kalimin e një kohe të arsyeshme, një provë e vetme e pa lidhur dhe shoqëruar më prova të tjera nuk mund të përbëjnë “arsye të mjaftueshme” për vazhdimin e paraburgimit.
Po ashtu, Gjykata ka cituar dhe dëshminë e dhënë nga Matrinaj, ku shprehet se ai ka tentuar të shuaj konfliktin e nisur mes Fabian Gaxhës dhe Meviol Bilos. Sipas dëshmisë tij, ai ka tentuar disa herë të mbyll sherrin e tyre, para se Bilo të qëllonte me armë zjarri për vdekje Gaxhën.
“Unë jam futur në mes për t’i ndarë dhe besoj se jam plagosur pa dashje nga “kokëmadhi” (Mavjol Bilo). Ai më gjuajti me refleks pasi nëse ai do të donte të më vriste, i kishte të gjitha mundësitë, pasi unë në tokë i shtrirë isha”.
Gjykata ka theksuar se Ervis Martinajn nuk ka qëlluar me armë zjarri në vendngjarje, ndërsa dëshmitarët janë shprehur se ai nuk ka qenë pjesë e konfliktit.
Sipas togave të zeza, në gjendjen që janë provat, veprimet e Martinajt në 4 tetor 2018 kualifikohen si fazë përgatitore për veprën penale për të cilën akuzohet, por jo për tentativën e saj./ Opinion.al E.Xh.
