Suzana Guxholli, e cila ka punuar si këshilltare për çështjet ekonomike pranë ish-Kryeministrit Sali Berisha është bërë aksionere e ish-uzinës Partizani 3 vite më parë. Shqiptarja.com, shkruan se Guxholli u bë pronare, në fund të muajit korrik 2013, pra një muaj pasi PD humbi zgjedhjet e përgjithshme, kohë kur ajo ende nuk e kishte dorëzuar detyrën shtetërore.
Referuar gjithnjë shkrimit në këtë të përditshme, citojmë se: “Guxholli rezulton të jetë bërë pronare mbi bazën e disa aksioneve të shpikura nga gjykata, pasi asnjë nga pronarët e kësaj shoqërie nuk ka lëvizur nga numri i aksioneve, ndërkohë që Guxholli hyn direkt me kapital të mjaftueshëm në këtë kompani”.
Emri i Guxhollit është radhitur mes 115 aksionerëve të kësaj kompanie, e cila tashmë administron dhe jep me qira disa ambientet të ish-uzinës së përpunimit të enëve të kuzhinës. Ajo ka një sipërfaqe prej 6 293 metra katrorë dhe gjendet në Don Bosko.
