Policia italiane ka sekuestruar një sasi prej 25 kg kokainë e pastër dhe rreth 35 kg përzierës dhe ka arrestuar 4 shqiptarë, të gjithë të lidhur me familjen Çapja në Elbasan.
Mediat italiane, duke iu referuar policisë raportojnë sot se gjithcka nisi pas arrestimit të shqiptarit Sajmir Serjani, një personazh pjesë e organizatës mafioze. Ishte 12 maji i shkuar kur ai ra në pranga dhe pas hetimeve, policia italiane mundi të shkatërrojë edhe gjithë bandën e trafikut.
Në makinën e tij, Peugeot, u gjetën të fshehura 600 gramë kokainë, kurse në banesë, gjatë kontrollit u gjet një makineri dhe para 108 mijë euro.
Zbulimi çoi në një punë të madhe kërkimore më pas. Prej javësh hetuesit me anë të çelësave, tentuan të hapnin shumë dyer apartamentesh në të gjitha zonat që frekuentonte Serjani, raportojnë mediat italiane, deri sa gjetën laboratorin e drogës.
Hap pas hapi, policia arriti deri te një banesë në Maddalene, e cila ishte në fakt një laborator i vërtetë ku bëheshin gati dozat. Vlera e drogës në treg arrinte mbi një milionë euro.
Gjatë hetimit, i koordinuar nga prokurori Stefano Castellani, janë arrestuar pesë persona dhe sekuestruar edhe disa makina, përfshirë një Audi A5 i përdorur nga trafikantët për të lëvizur dhe të shpërndarë drogën tek trafikantët që e shisnin.
Familja Çapja ka qenë gjithnjë nën shënjestër të atentateve dhe konflikteve të armatosur. Madje, ata janë akuzuar edhe për trafik droge.
Disa prej tyre humbën jetën në një atentat të organizuar në lokalin e tyre në Elbasan, çka u quajt edhe Masakra e Elbasanit./Panorama
