Gentian Doda është personi që fitoi lirinë nga gjyqtari i Apelit Shkëlqim Miri. Këtij të fundit po i kushton shumë vendimi për Dodën, pasi sot është vetë në bankën e të akuzuarve.
Por, 2 vite më parë, në gusht 2015 “Gazeta Shqiptare” bëri një reportazh në burgun e Fushë-Krujës. Asokohe në bibliotekën e burgut gjendej Gentian Doda. “Me puro në gojë e penela në duar, Gentian Doda, i dënuar 20 vjet për vrasje të dyfishtë kryer në vitin 1997, hedh imazhe të fiksuara në kanavacë”, shkruante GSH.
Kush është Gentian Doda
Gentian Doda u ekstradua nga SHBA-të për në Shqipëri në vitin 2012, i akuzuar për vrasjen e Gazmir Dedjas dhe Asllan Gjokës, ngjarje e ndodhur në tetor të vitit 1997. Doda dhe viktima Gazmir Dedja kanë qenë anëtarë të grupeve rivale në Burrel, konflikti ndërmjet të cilëve ka vijuar për shumë vite dhe me shumë viktima.
Ai është liruar nga burgu në gusht të këtij viti. Të gjitha proceset gjyqësore në Burrel dhe Tiranë u ndoqën edhe nga përfaqësues të ambasadës amerikane. Vendimi për lirimin e tij u dha nga gjyqtari i Apelit në Tiranë, Shkëlqim Miri. Gjyqtari sot akuzohet për korrupsion dhe prokuroria pretendon se ka marrë 30 mijë euro për lirimin e Dodës.
