Yannis Behrakis, kryeredaktori i Departamentit të Fotografisë në Reuters, ka ndërruar jetë në moshën 58-vjeçare pas një beteje të gjatë me kancerin. Ai ka fituar një sërë çmimesh prestizgjoze si World Press Photo në 2000, Calvados në 2002 dhe titullin “Fotografi i Vitit” nga Guardian në 2015, dhe në vitin 2016 çmimin e lartë Pulitzer, për mbulimin e krizës së refugjatëve.
Behrakis ka mbuluar disa nga ngjarjet më të trazuara anembanë botës, përfshirë konfliktet në Afganistan dhe Çeçeni, tërmetin më të madh në Kashmir dhe kryengritjen egjiptiane në vitin 2011.
Për tri dekada rresht ai ndoqi rregullisht dhunën dhe trazirat në Evropë, Rusi, Lindjen e Mesme, Afrikë dhe Azi me një aftësi të rrallë për të gjetur bukurinë mes kaosit dhe guximit të tij për të qenë në zemër të veprimit duke treguar terrorin e luftës, frikës dhe vdekjes.
Ai ka mbuluar gjithashtu luftën në Kosovë, ku fotografia e tij që përshkruan momentin kur një baba nga Kosova vendos në arkivol djalin e tij dy vjeçar Mazllum Sylmetaj, pranë trupave të tre anëtarëve të tjerë të familjes të vrarë po ashtu nga forcat serbe, u bë e njohur në mbarë botën. Bahrakis e ka shkrepur fotografinë nga lart dhe ka përdorur një teknikë të veçantë e cila të jep ndjesinë e lëvizjes.
Behrakis donte që në mënyrën më të bukur artistike, dhe me përkushtim, t’i tregonte njerëzimit të vërtetën nga zonat e luftës dhe vendet e krizës, në mënyrë që askush të mos thoshte se nuk dinte se çfarë po ndodhte realisht atje./E.M
