Rritet numri i kontribuuesve në skemën e pensioneve. Sipas të dhënave zyrtare të publikuara nga Instituti i Sigurimeve Shoqërore për periudhën 6 mujore Janar-Qershor janë shtuar 36.802 kontribuues të rinj, duke e çuar numrin total në gati 790 mijë, ku përfshihen subjektet publike, private, të vetpunësuarit në bujqësi dhe sigurimet vullnetare.
Sipas të dhënave, peshën më të madhe me afro 64 % e zënë kontributet nga subjektet private, ndërsa kontribuuesit nga subjektet publike zënë 20.1 % të totalit.
Sa i përket kontribuuesve të vetëpunësuar në sektorin e bujqësisë kanë pësuar rritjen më të madhe duke arritur në 9.8%. Ndikimin më të madh në numrin e shtuar të kontribuuesve e zënë fermerët më një rritje më të madhe se 19 mijë individë, numri më i lartë i kontribuuesve në bujqësi është në zonat fushore dhe më konkretisht në qarqet Elbasan, Fier, Korçë dhe Vlorë.
Privatët kanë një rritje të kontribuuesve në skemën e pensioneve me afro 14 mijë individ më shumë se sa 6 mujori i vitit 2022.
Rritjen e kontribuuesve, por edhe rritja e pagës minimale dhe maksimale mbi të cilën paguhen detyrimet e të punësuarve, kanë ndikuar edhe rritjen e të ardhurave në skemën e sigurimeve shoqërore po njëkohësisht është ulur edhe deficiti.
Më konkretisht të ardhurat janë rritur me 7.6 miliardë Lekë në 6 mujorin e parë të 2023, krahasuar me të njëjtën periudhë të një viti më parë, ndërsa në total për këtë periudhë janë arkëtuar afro 57 miliardë Lekë nga rreth 49 miliardë që u arkëtuan për të njëjtën periudhë të vitit të shkuar.
Subvencioni i skemës nga buxheti i shtetit në 6 mujor regjistrohet në 8.8 miliardë Lekë, me një ulje prej 4 miliardë Lekësh në krahasim me 6 mujorin e parë të vitit 2022 që ishte mbi 12 miliardë Lekë.
Klan News
