18% më shumë prona janë listuar në platformën online Airbnb në prag të nisjes së sezonit turistik.
Referuar statistikave të kësaj platforme ky fond banesash zë rreth 32% të totalit të tyre, duke e çuar numrin e pronave aktive në 3070 njësi apartamentesh.
Ekspertët e lidhin ketë tregues çdo vit e në rritje me komoditetin që të huajt kërkojnë, por edhe leverdinë në çmim.
“Investimet e reja shtojnë gamën dhe mundësinë që klientët të kenë për të përzgjedhur standardet e apartamenteve që ata zgjedhin dhe në varësi të buxheteve që ata kanë. Numri i shtretërve dhe ditëve të qëndrimit që kanë në Aribnb sigurisht janë më të larta se ato që kemi në hoteleri. Vitet e fundit ky është futur një koncept masiv dhe njerëzit që merren me këtë industri po fitojnë prej saj”, tha Orgest Beti, konsulent imobiliar.
Nga ana tjetër edhe strukturat hoteliere janë bërë gati për të pritur turistët e huaj, duke përmbushur 35% të prenotimeve.
“Ky vit ka qenë një vit prove, falë përmirësimit të imazhit të Shqipërisë kemi një turizëm pothuajse në të gjithë territorin. Hotelet tona duhet të punojnë me paketa të plota në mënyrë që një turist që vjen në Shqipëri duhet të dijë saktësisht sa i shkon kostoja e këtyre pushimeve”, tha Zak Topuzi, kreu i Shoqatës së Hoteleri-Turizmit.
Me qëllim taksimin në bazë të referencës drejtoria e përgjithshme e tatimeve ka kërkuar nga hotelet plotësimin e formularit ku deklarojnë kapacitetin e tyre si dhe nivelin e shfrytëzimit.
Tv Klan
