Shterpësia e Superiores/ Rekordi negativ, dy javë kampionat, kanë shënuar vetëm 4 ekipe

Ndoshta po të hapen “defterët”, mund të gjendet ndonjë rast i ngjashëm, por është vërtet e çuditshme ajo që ka ndodhur në Kategorinë Superiore në dy javët e para të sezonit të ri.Plot 60% e skuadrave pjesëmarrëse, 6 të tilla, nuk kanë shënuar ende në sezonin e ri, Partizani ka shënuar vetëm një gol dhe kampionatin e nderojnë vetëm Skënderbeu, Flamurtari e Kukësi, që kanë shënuar në total 13 nga 14 golat e sezonit.Laçi, Tirana e Vllaznia janë për rekord edhe në mbrojtje, sepse e kanë golaverazhin 0:0 pas 180 minutash.Mbrojtje perfekte, apo sulmues të dobët?Ndoshta përgjigja është një tjetër: mentaliteti i skuadrave në Superiore po bëhet gjithnjë e më mbrojtës, duke menduar vetëm të shkatërrojnë lojën e kundërshtarit, ndërkohë që nuk po shohim të evidentohen e zbulohen më lojtarë organizatorë të mirëfilltë, si Bledi Shkëmbi në dekadën e fundit te Skënderbeu, për shembull.Skënderbeu ka një skuadër mjaft të konsoliduar dhe e ka luksin të luajë me një, dy apo 3 sulmues, aq më shumë që ka një si Hamdi Salihi përpara, konstant dhe i saktë si një orë zvicerane.Kukësi ka tashmë kroatin Pero Pejiç, një “përbindësh” zone, por edhe mesfusha është mjaft cilësore, ku spikat Edon Hasani.Flamurtari ka rikuperuar Hair Zeqirin dhe ka zbuluar bujshëm Donjet Shkodrën, autor i 3 golave për kopertinë, me “predha” nga distanca, gjë që e shohim shumë rrallë në Shqipëri.Të tjerët? Thuajse asgjë, edhe pse në teori lojtarë si Vucaj, Faton Toski e Nexhipi bëjnë diferencën në Superiore, por duke parë sulmuesit e paktë cilësorë që luajnë në Shqipëri, edhe këta nuk e kanë të lehtë.