Ngjarja e tmerrshme ka ndodhur më Gremmensdorf të Gjermanisë.
Gruaja 45 vjeçare me prejardhje nga Kosova i ka hedhur mbi kokë burrit të saj 47 vjeçar një tenxhere me vaj që po vlonte.
Gjykimi i saj ka filluar javën e kaluar ndërsa vendimi pritet të merret më 27 qershor. Është e mundur që gruaja të gjykohet me qëndrim të përhershëm në psikiatri pasi konsiderohet se është e papërgjegjshme dhe vuan nga skizofrenia.
Ai po rrinte i shtrirë, me krahun e majtë mbi fytyrë ndërsa televizori ishte duke ndezur.
Për një moment, krejt papritur ai ndjen dhembje të papërshkrueshme në fytyrë.
Gruaja pa pritur e kujtuar ia hedh atij lëngun e trashë, të yndyrshëm e të vluar në fytyrë, në qafë, në krah. Lëkura u dogj brenda pak sekondave.
Pasi i ka derdhur tenxheren me gjysmë litri vaj të vluar, gruaja ka ikur nga shtëpia, përcjell albinfo.ch.
Burri ka pësuar djegie të rënda, të shkallës së dytë dhe të tretë. Atij i është dashur të qëndrojë tri javë e gjysmë në gjendje kome në një spital të specializuar të Bohumit, si pasojë e djegieve të rënda, ka thënë viktima para trupit gjykues në Gjykatën e Landit, ku bashkëshortja e tij po gjykohet.
Por, sipas të gjitha gjasave, ngjarja e tmerrshme që ka ndodhur në janar të këtij viti nuk është e dënueshme pasi nuk është bërë në gjendje të vetëdijshme, transmeton albinfo.ch.
Gruaja vuan nga skizofrenia ndërsa trupit gjykues i mbetet të vendosë nëse ajo do të dërgohet në psikiatri të mbyllur, për tërë jetën.
Çifti nga Prishtina kishte kërkuar azil në Gjermani në vitin 1991.
Pasi i kishin kthyer ata kishin ardhur sërish në vitin 1999 dhe kishin kërkuar azil sërish. /albinfo.ch/
