Artur Rrapaj, shqiptari i arrestuar gjatë operacionit për kapjen e bosit më të madh të një rrjeti trafiku droge me pseudonimin “Gato”, ka dhënë detaje rreth lidhjes së grupit kriminal me mafien shqiptare.
Gjatë operacionit për arrestimin e “Gato”-s, efektivët njoftuan se gjatë bastisjes të disa banesave, arrestuan një shqiptar. 37-vjeçari shqiptar u kap me disa telefona satelitorë, pajisje GPS dhe 319 mijë dollarë cash.
Inteligjenca e policisë nuk e kishte identifikuar Rrapajn si pjesë e strukturës së Nueva Generación, organizatë që drejtohej nga Sánchez Farfán. Megjithatë, me arrestimin e tij u nxorrën në dritë të dhëna mbi një marrëdhënie që tashmë ishte gjurmuar.
Oficerët identifikuan se mafia shqiptare që vepron në Guayas punon me kartelin Nueva Generación. Ndërkaq, mediat e huaja shkruajnë se prania në Ekuador e Rrapajt, një shqiptari me precedentë penalë në Shqipëri dhe me pasaportë të skaduar 10 vite më parë, nuk është befasuese, përkundrazi, konfirmon disa hipoteza të hetuesve.
ROLI I MAFIAS SHQIPTARE
Që nga vitet 2000, e ashtuquajtura mafia shqiptare ka dërguar ‘emisarë’ në Amerikën Latine. Konkretisht në Meksikë, Ekuador, Kolumbi dhe Peru. Qëllimi ishte blerja e kokainës së lirë. Një burim policor i tha PRIMICIAS se shqiptarët, me bazë në Ekuador, fshihen pas profilit të biznesmenëve të lidhur me eksportet e ushqimit. Por ata janë me të vërtetë përgjegjës për rregullimin e detajeve logjistike për dërgimin e kokainës në Evropë.
Kjo ishte pikërisht një nga pikat e forta të strukturës të grupit kriminal të menaxhuar nga ‘Gato’. Në vitin 2022, Departamenti i Thesarit i Shteteve të Bashkuara e renditi Sanchezin si një nga narkotikët kryesorë në botë. Raporti thotë se dërgesat e kokainës me ‘Gaton’ bëheshin nga Ekuadori. Trafiku bëhej këtë përmes anijeve detare dhe kontejnerëve tregtarë.
KONTAKTI ME SINALOA-N
Mediat e huaja ndër të tjera flasin për lidhje të mafies shqiptare me kartelin Sinaloa. Në shtator 2022, qeveria meksikane detajoi se kreu i Sinaloa ‘El Mayo’, Zambada ishte aleat me mafian shqiptare. Konkretisht me vëllezërit Luftar, Arben, Fatos dhe Ramiz Hysa. Përveç krijimit të rrugëve të drogës për në Evropë, shqiptarët bashkëpunojnë me Sinaloan në pastrimin e parave. Sipas një investigimi të gazetës El Universal de México, kjo strukturë menaxhon një rrjet kazinosh dhe biznesesh. Përmes këtyre qendrave pastrohen miliona euro nga krimi i organizuar.
NJË RRJET TRANSNACIONAL
Lidhjet e ‘Gato’ me kartelin Sinaloa dhe mafian shqiptare nuk do të ishin të vetmet në nivel ndërkombëtar. Karteli i Gjeneratës së Re, i cili në Ekuador përbëhet nga grupe si ‘Los Lobos’ dhe ‘Los Tiguerones’, kishte edhe lidhje të tjera. Kjo u zbulua nga agjentët që morën pjesë në operacionin për kapjen e tij, si në Kolumbi ashtu edhe në Ekuador.
Më parë, inteligjenca ushtarake ekuadoriane kishte raportuar se FOS punon ngushtë me Los Tiguerones. Marrëdhënia e tyre bazohet në dërgimin e kokainës që më pas transportohet në portet në bregdetin e Ekuadorit për eksport.
Me fjalë të tjera, karteli Nueva Generación, i komanduar nga ‘Gato’, arriti të krijojë një strukturë narko-kriminale me lidhje me: Meksika (kartelet Sinaloa dhe Jalisco Nueva Generación), Kolumbi (Oliver Sinisterra Front), Evropa (Mafia Shqiptare dhe Klani Devesa).
