Kur duhen edhe pak orë që të ngjitet në skenën e Sanremos, Ermal Meta është më i dëgjuari në TIMmusic. Kënga “Odio le favole”, “I urrej përrallat”, me të cilën shqiptari me origjinë nga Fieri konkuron ne kategorinë e të rinjve në Sanremo është në krye të listës së këngëve më të preferuara.
Gjatë gjithë javës në platformën TIM, që i dedikohet muzikës digjitale përmes aplikacionit TIMmusic, kënga e Ermal Metës ka qenë më e përzgjedhura. Në dedikimin që i bën në rrjetet sociale ndjekësve të admiruesve të muzikës së tij, Ermal Meta shkruan se sfida do të jetë e fortë, në luftë dhe në dashuri gjithçka është e lejuar, por për mua muzika është dashuri.
I vlerësuar nga kritika italiane për zërin dhe teknikën e të kënduarit, Ermal Meta është shqiptari i dytë që prek magjinë e teatrit “Ariston”. E para ishte Elsa Lila në vitin 2003. Karrierën si këngëtar dhe tekstshkrues e nisi fillimisht me grupin “La Fame Di Camilla”. Gjatë rrugës talenti i tij i lindur por edhe i kultivuar ndër vite u vlerësua nga Patty Bravo, Marco Mengoni, Giusy Ferreri apo Emma Marrone me te cilët shqiptari me pasaportë italiane Ermal Meta pati bashkëpunime. / Tv Klan
