Një shqiptar i arrestuar në Francë është gjetur i vdekur në burg. Mësohet se shqiptari është identifikuar si e Mentor Rexha, i cili kishte në procedura për të marrë azil në Francë.
Sipas autoriteteve franceze Rexha është vetëvrarë në 31 janar, por ky njoftim është bërë një javë me vonesë pas vdekjes së të riut shqiptar.
Ndërkohë, motra e tij, Suela Rexha është shprehur për mediat se nuk janë lajmëruar në rrugë zyrtare për vdekjen e 36-vjeçarit, por nga persona të tjerë. Familjarët kanë dyshime të forta që është dhunuar nga gardianët e burgut.
Trupi nuk është kthyer ende në Shqipëri, ndërsa të afërmit bëjnë apel për ndihmë, sepse ambasada shqiptare në Francë është shprehur se nuk ka fonde për t`i asistuar.
Mentor Rexha, lindur në Lezhë dhe me banim në Shkodër, përpara një viti kishte udhëtuar drejt Francës si emigrant dhe kishte aplikuar për procedurat e marrjes së statusit të azilantit.
Por ndërkohë, ai ka përfunduar në burg bashkë me dy shqiptarë të tjerë për djegien e disa automjeteve, ndërsa e motra thotë se në komunikimet që kanë pasur, Rexha gjithmonë ka pretenduar pafajësinë.
Duke mos besuar variantin e autoriteteve franceze, të afërmit i kanë bërë dhe foto trupit që tregojnë një shenjë litari në fyt, por edhe të çarë në kokë si dhe shenja të tjetra në trup, që i bën ata të dyshojnë se e vërteta nuk është aspak siç po u paraqitet.
Kjo ngjarje është e përafërt me rastin e Florenc Beqiraj, i cili vdiq në një burg të Francës, teksa ishte dhe ai në pritje të azilit./ Opinion.al
