BBC, në seksionin ‘Crimewatch’ që publikon rastet e rënda kriminale në Britaninë e Madhe, ka nxjerrë gjithashtu edhe një foto të një shqiptari dhe kërkon ndihmë për kapjen e tij. Sipas të dhënave, personi shpallur në kërkim është Genci Koburi.
Ai ka edhe dy emra të tjerë me të cilët njihet, Ari Goburi apo Aleksis Kordaas. BBCja shkruan se shqiptari me identitet të trefishtë është arrestuar pas sherrit që shkaktoi në një lokal ne Mançester, ku mbetën të plagosur rëndë tre persona.
Ai po hetohej në gjendje të lirë pasi pagoi një garanci, por më pas është zhdukur. Në njoftimin e ‘Crimewatch’ thuhet se ai është 42 vjeç, nga Shqipëria dhe me lidhje të shumta në Wiltshire dhe Mançester.
