Alban Dervishi ishte shumë i ri kur u largua nga Shqipëria drejt Shteteve të Bashkuara të Amerikës. Gjatë këtyre viteve ai ka zhvilluar një karrierë të shkëlqyer në Marinën amerikane.
Më 25 Qershor do të marrë komandën e USS Pearl Harbor, duke u bërë komandanti i parë shqiptar që merr drejtimin e një luftanijeje amerikane.
“Procesi për t’u kualifikuar fillon shumë herët, ka 3-4 vjet që u zgjodha për komandë. Pastaj ka një seri kualifikimesh për të parë se cilën anije do të japin. Para 1 viti e ca kur ishte momenti që duhej të zgjidhja mendova thashë të gjej një anije me një emër që po t’ia them një shqiptari, do thotë e mbaj mend, Pearl Harbor. Pata fatin e zgjedhjes. Atë anije thashë, atë më dhanë”, tha Dervishi.
USS Pearl Harbor është një anije amfibe. Mjete të ndryshme futen brenda anijes dhe është gjithçka e koordinuar që ekuipazhi i Dervishit prej 300-350 vetësh të marrë rreth 500 trupa që janë marinsa zakonisht.
“Anija normalisht ka një peshë prej 16500 tonë, shto edhe 2 mijë tonë kur vijnë marinsat me mjetet e tyre”, tha Dervishi
Dervishi tregoi se fatkeqësisht nuk ka asnjë shqiptar në ekuipazhin e tij, megjithatë theksoi se ka shumë shqiptarë në ushtrinë amerikane. Ai rrëfeu se është shumë i lidhur me Shqipërinë dhe e viziton shpesh.
