Shënim, nga Drini ZEQO
Kohët e fundit stinët kanë pësuar disa luhatje të cilat komentohen si jo të zakonshme për normalitetin e tyre. Ja kris shiu kur sapo ka dalë dielli dhe e kundërta. Ulen dhe ngrihen temperaturat kur në të vërtetë përgatitesh për një normalitet të tyrë meqë kemi hyre në muajin maj dhe jemi në prag të stinës së nxehtë.
(Mos u mërzisni ky nuk është një koment mbi parashikmin e motit…)
Sidoqoftë teknologjia na mundëson të gjithëve të kemi një parashikim të personalizuar të situatës meteorologjike. Të gjithë me një klikim shohim si do të jetë moti në ditën pasardhëse. Por ajo që edhe në këtë pikë na bën ne Shqiptarëve të dallueshëm në llojin tonë është mënyra si, ku dhe sa flasim për motin.
Sapo takon dikë, e dëgjon të shfryjë për motin, ankohet se është bërë shumë ftohtë, ankohet se nuk di si të vishet. Ti gjendësh në një situatë ku je i detyruar të fillosh të flasësh për motin (ndonëse interesat e tu janë krejt të tjerë). Ja kthen duke i thënë se me gjasa kështu do të jetë moti edhe në ditët në vijim.
Papritur e gjen veten në një mjedis ku të gjithë fillojnë të flasin si ekspertë për kushtet e motit (gjë të cilën në Shqipëri e bëjmë me pasion dhe bindje edhe për fusha të tjera). Nuk është habi që shpesh ky bashkëbisedim kthehet në debat. Besoj i keni parasysh debatet e forta në Shqipëri ku flitet për politikë. Të gjithë pozicionohen në një kah dhe ja shtrojnë argumentave sipas qejfit të tyre.
Por ajo qe vihet re është se të gjithë kanë kaq shumë kohë të flasin për motin. Duket si një temë që i shtyn njerëzit të krijojnë një afrimitet më të madh (kur nuk e kanë). Ose të mbushin hapesira boshe në pamundësi për të qenë më kualitativ për fjalosjet e tyre.
Por mbase më e vërteta nga të gjitha është se Shqiptarët janë shumë të papunë dhe të ngeshëm. Por edhe kur kanë shumë punë për të mbaruar ato i lënë në pritje se domosdo, të flasësh për motin është një prioritet absolut. Kanë kaq shumë kohë për të folur deri me orë të tera për një temë mbi të cilën nuk kanë as ndikimin më të vogël.
*Këtu fillon një debat tjetër i cili pa habi mund të marrë dhe nota politike ndaj më mirë të ndalojmë këtu.
