Gazeta gjermane, Frankfurter Allgemeine Zeitung (FAZ), e afërt me qeverinë e kancelares Angela Merkel thotë se Shqipërisë i duhet një koalicion i madh për t’u nisur drejt anëtarësimit në BE.
Në një shkrim të gjatë për krizën politike, FAZ thekson: Edi Rama, është tallur me opozitën shqiptare, duke e këshilluar atë që zhvesh bluzat, të braktis stadiumet dhe të luajë futboll në rrugë. Rama e ka krahasuar veten dhe qeverinë e tij me Juventusin, i cili edhe sivjet është i pari në tabelën së ligës italiane të futbollit.
Opozita, thekson FAZ, e ka dëgjuar këshillën e Ramës dhe ka vendosur të luajë lojën “në rrugë”, duke shpresuar se e fiton atë. Partia Demokratike dhe partnerët e saj kanë braktisur parlamentin, duke djegur mandatet.
Gazeta e rëndësishme gjermane shkruan se kryeministri Edi Rama po akuzohet për manipulim të zgjedhjeve të vitit 2017, korrupsion dhe lidhje me krimin e organizuar. Partia Socialiste ka 74 deputetë në Kuvendin e Shqipërisë (nga gjithsej 140 mandate). Kjo, sipas gazetës gjermane, është një shumicë e ngushtë, prandaj krahasimi i Ramës me futboll është i pavend. Krahas 43 deputetëve të Partisë Demokratike nga Kuvendi u larguan edhe 19 deputetë të LSI-së dhe tre përfaqësues të tjerë të popullit.
Pas këtyre largimeve Rama dhe partia e tij janë mjaft të vetmuar – jo vetëm në parlament. FAZ njofton se të pakënaqur janë jo vetëm përkrahësit e opozitës. Gjatë muajve të fundit ka pasur shpesh protesta të studentëve kundër tarifave dhe kundër gjendjes së tmerrshme në konvikte.
Gazeta gjermane thekson se në vend të ashpërsimit ritual të luftës politike Shqipërisë i duhet një koalicion i madh për t’u nisur drejt anëtarësimit në Bashkimin Europian. Këtë, sipas FAZ, e tregojnë edhe të dhënat demografike. / Opinion.al
