Ministri i Jashtëm i Italisë, Antonio Tajani ka deklaruar se marrëveshja me Shqipërinë për emigrantët është një pjesë e rëndësishme e strategjisë tërësore të qeverisë italiane për të frenuar fluksin e emigracionit ilegal.
Duke raportuar në Parlament, ai është shprehur se memorandumi i mirëkuptimit ndërmjet Italisë dhe Shqipërisë për emigrantët “nuk mund të krahasohet me marrëveshjen midis Mbretërisë së Bashkuar dhe Ruandës.”
“Nuk ka kontraktim të Jashtëm të menaxhimit të kërkesave për azil në një vend të tretë. Dhe nuk ka asnjë shmangie nga të drejtat e garantuara ndërkombëtarisht.”
Kështu theksoi ministri Jashtëm, Antonio Tajani ndërsa komunikonte me Dhomën e Deputetëve për marrëveshjen e fundit me Tiranën, shkruan RaiNews.
“Shqipëria do të anëtarësohet së shpejti në Bashkimin Evropian dhe është pjesë e Këshillit të Evropës. Përjashtimet do të ishin të pamundura,” shtoi ai.
Ai ka nënvizuar se Italia synon të dalë me një qasje të re në menaxhimin e flukseve migratore dhe ka shtuar se luftimi i trafikut të qenieve njerëzore është prioritet i qeverisë.
“Protokolli i nënshkruar me Shqipërinë parashikon që në të dyja qendrat nuk do të mund të qëndrojnë mbi 3 mijë emigrantë njëkohësisht. Gjithashtu, emigrantët do të mund të arrijnë në portin shqiptar vetëm me anijet e autoriteteve italiane që kanë ndërhyrë në operacionet e shpëtimit”, ka deklaruar Tajani.
Shefi i diplomacisë italiane ka saktësuar se, në asnjë rrethanë nuk do të tërhiqen me rimorkio varkat e skafistëve dhe se drejt Shqipërisë nuk do të dërgohen anije të menaxhuara nga organizatat joqeveritare.
Sipas tij, emigrantët do të kenë të njëjtin trajtim që parashikohet nga normat italiane dhe evropiane.
“Parandalimi i nisjeve ilegale, forcimi i kufijve të jashtëm, luftimi i skafistëve, përmirësimi i sistemit të riatdhesimit dhe prioritete të tjera janë përbërësit kryesorë të qasjes së re që po përpiqemi të afirmojmë në Evropë dhe është në këtë kornizë që hyn protokolli i bashkëpunimit me Shqipërinë”, ka sqaruar Tajani.
