Pas barazimit me Moldavinë, Shqipëria është kualifikuar në Euro 2024. Është hera e dytë që Shqipëria shkon në një kompeticion kaq të madh.
Pas ndeshjes, foli Presidenti i Federatës Shqiptare të Futbollit, Armand Duka, i cili vlerësoi skuadrën si dhe punën e bërë nga trajneri Sylvinho.
Si ndiheni pas kualifikimit?
Ishte fundi i një cikli shumë të bukur, një edicioni fantastik, ku çunat dhanë maksimumin. Kanë shumë cilësi, përveç shpirtit dhe dashurisë për fanellën. Falënderoj shumë çunat që ishin në fushë, Sylvinhon, stafin dhe tifozerinë e mrekullueshme në të gjithë rrugëtimin.
Lot gëzimi, të një populli që feston…
Jam shumë i bindur që të gjithë po festojnë, dikush duke brohoritur e dikush me lot. Ua dedikojmë suksesin atyre çunave fantastikë, që janë të gjithë të mrekullueshëm dhe me dëshirë të madhe për fanellën. Falënderoj të gjithë, edhe mediat që na kanë qëndruar pranë në këtë rrugëtim
Tani do të përpiqemi të fitojmë edhe Europianin…
Është hera e dytë në Europian dhe do të provojmë të bëjmë më mirë se herën e parë. Atje ka shumë kualitet dhe është më e vështirë, por shpresoj të bëjmë sa më mirë.
