Shqipëria nën ndikimin e temperaturave të pazakonta. Vala e të nxehtit pritet të ngjisë termometrin në Elbasan në 41 gradë Celsius.
Meteorologu Hakil Osmani tha se këto temperatura të larta pritet të vijojnë edhe gjatë fundjavës, ku përveç Elbasanit, të shtunën 41 gradë pritet të shënojë temperatura edhe në Berat.
“Në fakt dita e sotme do të jetë një nga ditët më të nxehta, pasi kemi maksimumet që regjistrojnë vlerat 41 gradë Celsius në qarkun e Elbasanit. Gjithashtu pritet një tjetër ditë me temperatura shumë të larta. Mbetemi në vlerën 41 gradë Celsius ditën e shtunë, por do të ketë tashmë, jo vetëm në qarkun e Elbasanit, edhe qarku i Beratit do të ketë temperatura të cilat do të regjistrohen në vlerat 41 gradë Celsius”, tha meteorologu Hakil Osmani.
Pritshmëri për kalimin e kësaj vale të të nxehtit janë gjatë javës tjetër, ku temperaturat pritet të kthehen në normat e muajit korrik.
“Për fat të mirë, duke filluar nga e hëna e në vijim, të paktën ditën e mërkurë dhe të enjte ka një sinjal që të kemi një rënie graduale të temperaturave të ajrit, duke bërë që dita e mërkurë dhe dita e enjte të jenë pothuajse shumë më normale se këto që po përjetojmë tani, si pasojë e tërheqjes graduale të valës së të nxehtit,” tha ai.
Temperaturave të larta nuk do t’u shpëtojë as Rajoni, ku në Shkup do të kemi temperatura deri në 41 gradë, por gjatë fundjavës temperaturat do të bien gradualisht. Klan News
