Në një konferencë të përbashkët për mediat me Zv/Kryeministrin dhe ministrin e Punëve të Jashtme dhe Bashkëpunimit Ndërkombëtar të Italisë, Antonio Tajani, kryeministri Edi Rama komentoi qëndrimin kundër të Shqipërisë ndaj deklaratës së BE për dialogun Kosovë – Serbi.
“Qëndrimin tonë për herë të parë në 10 vitet e fundit në kundërshtim me një deklaratë të politikës së jashtme të BE-së ky qëndrim lidhet me faktin se deklarata e BE-së është një deklaratë e cila jo se në vetvete ka problem, pasi adreson gjithçka që është thënë më parë nga Borrell lidhur me detyrimet e Kosovës në raport me dialogun, por ka një problem të madh se nuk i përgjigjet realitetet të ditëve të fundit. E kemi të pamundur që të linjëzohemi me BE-në pa parë një deklaratë të dytë ku adreson ngjarjet dramatike , ku është vrarë një efektiv i policisë së Kosovës nga një grup kriminal ku ka qenë qartësisht i investuar që të ushtrojë terror në veri të Kosovës gjë që është pasur nga shpallja e një ditë zie kombëtare në Beograd, kjo për ne është e papranueshme, madje është e dënueshme sepse është jo evropiane është sinjali më i keq që Serbia mund të jepte në këtë moment për të gjithë Rajonin e BE-në. Të vihet alarmi në nivelin diplomatik më të lartë, ti japë mesazhin e papranueshëm. Deri në momentin kur nuk do të ketë një deklaratë të dytë për të vendosur me drejtësi për ditët e fundit ne nuk do të linjëzohemi me deklaratën e parë. Ky është momenti për të dënuar me zë të lartë atë që ndodhi në veri të Kosovës dhe më pas me çfarë u pasua në Beograd me shpalljen ditë zie, duke heroizuar njerëz që ushtruar terror në veri.”- tha Rama.
Pas sulmit të ndodhur në veri të Kosovës, Shqipëria nuk ka mbështetur deklaratën e BE për dialogun Kosovë-Serbi.
Sipas Tiranës zyrtare, kjo është hera e parë që Shqipëria del kundër linjës së Bashkimit Evropian, duke mos pranuar deklaratën e Borrel që fajësonte Kurtin për dështimin e dialogut me Serbinë.
Deklarata është bërë në 19 shtator, duke ju referuar kryesisht zhvillimeve në veri të Kosovës.
Sipas përfaqësuesit të lartë të BE, Joseph Borrel, lëvizjet e Kosovës nuk janë në përputhje me ligjin dhe kontribuojnë për të rritur tensionet.
Kjo e mërkurë ishte afati i fundit i vendosur nga BE për t’u shprehur nga vendet anëtare dhe ato kandidate, në mënyrë që qëndrimi të ishte i linjëzuar. Në këtë rast, Shqipëria ka zgjedhur të jetë krah Kosovës, duke theksuar se deklarata e ka humbur tashmë aktualitetin dhe se nuk mund të kërkohet përgjegjësia vetëm te Kosova./Opinion.al
