Kryetari i parlamentit të Kosovës, Glauk Konjufca tha se bashkëpunimi parlamentar mes Shqipërisë e Kosovës është ngritur në një tjetër nivel.
Në fjalën e mbajtur në seancën parlamentare të përbashkët të Shqipërisë e Kosovës në Prishtinë, Konjufca tha se Shqipëria dhe Kosova synojnë të jenë pjesë e të njëjtës familje, BE-së.
”Ky përbashkim i yni sot përbën më shumë se simbolikë. Kjo seancë duhet parë si dëshmi se Kosova e Shqipëria janë me njëra-tjetrën pa asnjë kusht. Ne duhet të përfaqësojmë një komb, që për ne është i përbashkët. Bashkëpunimin parlamentar e kemi ngritur në nivel tjetër e kjo për ne ka qenë një arritje e konsiderueshme. Shqipëria e Kosova synojnë të njëjtën familje, BE-në. Kosova mbetet kampion i demokracisë në rajon dhe me këtë duhet të krenohemi si popull.
Shqiptarët kanë qenë aleati më i natyrshëm i vlerave perëndimore në Ballkan. Falënderojmë Tiranën për mbrojtjen e Kosovës në forumet e botës. Kosova ka në krah Republikën e Shqipërisë. Në fund dëshiroj të uroj shqiptarët në shtetet tona për festat e fundvitit dhe urojmë një vit më të mirë për të gjithë”, tha Konjufca.
